Azərbaycan, Bakı, 27 dekabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) və Türkiyənin "Botaş" dövlət boru kəməri şirkəti Azərbaycan qazının Türkiyə ərazisindən keçməklə Suriyaya tranzitinin perspektivlərini müzakirə edirlər. Bu barədə ARDNŞ-nin rəhbəri Rövnəq Abdullayev bazar ertəsi məlumat verib.
Azərbaycanla Suriya arasında ildə bir milyard kubmetr qaz satışı üzrə qarşılıqlı anlaşma memorandumu var.
"Hazırda bu layihə çərçivəsində iş aparılır və işlər 2011-ci ildə davam etdiriləcək", - Abdullayev bildirib.
Onun sözlərinə görə, ARDNŞ Azərbaycan qazının Türkiyə ərazisindən keçməklə Suriyaya tranzitinin texniki şərtləri və dəyərini də razılaşdırmaq niyyətindədir.
"İşlər, həcminin 2 milyard kubmetr artırılması mümkünlüyü ilə 2015-ci ildən sonra Azərbaycan qazının satışına başlamaqla əlaqədar aparılır", - Abdullayev bildirib.
BP-nin məlumatına görə, 2009-cu ildə Suriyada qaz hasilatı 5,8 milyard kubmetr təşkil edib ki, bu da 2008-ci ildə olduğundan 6,2 faiz çoxdur.
The Oil and Gas Journal-ın 2010-cu il yanvarın 1-nə məlumatına görə, Suriyada sübut edilmiş qaz ehtiyatları 243 milyard kubmetr təşkil edir.
ABŞ Dövlət Enerji İnformasiyası İdarəsinin (EIA) məlumatına görə, 2008-ci ildə Suriyanın qaz idxalı 143 milyon kubmetr, tələbatı 6 milyard kubmetr təşkil edib.