Azərbaycan, Bakı, 12 yanvar /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) 2011-ci il üçün planları çərçivəsində "Neft Daşları" NQÇİ Xəzərin Azərbaycan sektorunda eyni adlı yataqda hasilat həcminin qorunması proqramını hazırlayır. Bu barədə çərşənbə günü ARDNŞ-dəkı mənbə deyib.
Onun sözlərinə görə, proqram 2011-2015-ci illərə hesablanacaq. Proqram çərçivəsində dəniz platformalarının tikintisi və hasilat quyularının qazılması nəzərdə tutulur, bu, yataqda neft hasilatının səviyyəsinin qorunması üçün lazımdır.
"Bir həftədən sonra proqramın layihəsinin təsdiq üçün "Azneft" İstehsalat Birliyinə verilməsi gözlənilir", - mənbə bildirib.
Bundan əvvəl ARDNŞ rəhbəri Rövnəq Abdullayevin dediyi kimi, 2011-ci il üçün şirkət qarşısına qoyulan məqsədlərdən biri yeni platformaların tikilməsi və artıq mövcud olanların təmiri, boru kəmərlərinin çəkilməsi, "Günəşli" və "Neft Daşları" yataqlarında yeni quyuların qazılmasıdır.
ARDNŞ-nin məlumatına görə, 1949-cu ildən istismar olunan "Neft Daşları" dəniz neft-qaz yatağının çıxarıla bilən qalıq ehtiyatları 182 milyon ton neftdən çoxdur. Bu yatağın geoloji ehtiyatları 365 milyon ton həcmində qiymətləndirilir. Mənimsənilmə üzrə mövcud layihəyə uyğun olaraq, "Neft Daşları" yatağının işlənməsi 2035-ci ildə başa çatmalıdır.
