Stokholm, İsveç, 17 yanvar /Trend, müxbir Ü.Sadıxova/
Azərbaycan bu gün olduğu kimi, gələcəkdə də Avropaya ən vacib enerji tədarükçülərindən biridir ki, bu da tərəflər arasında əməkdaşlığın inkişafına böyük töhfə verir. Hakim "Moderatlar" partiyasından İsvec parlamentinin üzvü Qustav Bliks belə hesab edir.
Bliksin sözlərinə görə, İsveç Avropanın enerji bazarına inteqrasiyada önəmli rol oynamağa çalışır və enerji təhlükəsizliyinin təmin olunması və enerjidaşıyıcıların məhdud sayından asılılığın azaldılması üçün kifayət qədər resursların mövcudluğunu təsdiq edir.
"Bizim Avropada vəzifəmiz enerji bazarının inteqrasiyası və liberallaşdırılması olaraq qalır, çünki bu, həm gələcək alınmalar, həm iqlim, həm də iqlim ehtiyatlarının təmin olunması baxımından sərfəlidir", - İsveç parlamentinin Avropa məsələləri komitəsinin üzvü Bliks Trend-ə müsahibəsində bildirib.
Onun sözlərinə görə, Avropanın böyük sayda enerji tədarükçüləri ilə əməkdaşlıq etməsi vacibdir.
Enerjidaşıyıcıların Avropa bazarlarına tədarükü üzrə boru kəmərləri, o cümlədən "Nabukko" barədə danışan Bliks deyib ki, bu istiqamətdə mühüm addımlar atılır. Bliks hesab edir ki, "Nabukko" layihəsi Avropa ölkələrinin bir neçə enerji tədarükçüsü ilə təmin olunmasında atılan addımlardan biridir.
"Lakin siyasi və iqtisadi baxımdan əmin olmaq vacibdir ki, bunlar Avropa və digər region ölkələri üçün səmərəli layihələrdir", - Bliks bildirib.
ABŞ Dövlət Enerji Məlumatları İdarəsinin (EIA) məlumatına görə, İsveçdə qaza olan tələbat 1,16 milyard kubmetr təşkil edib. 2008-ci ildə bu göstərici 0,85 milyard kubmetr olub.
