Azərbaycan, Bakı, 19 ytanvar /Trend, müxbir E.İsmayılov/
2011-ci ildə ARDNŞ (Azərbaycan Respublikası Dövlət Neft Şirkəti) "Qazprom" şirkəti ilə imzalanmış ortamüddətli müqavilə çərçivəsində Ruisiyaya 1,5 milyard kub metr qaz ixrac etməyi nəzərdə tutur. Bu barədə "Respublika" qəzetinə müsahibəsində ARDNŞ-nin birinci vitse-prezidenti Xoşbəxt Yusifzadə deyib.
Onun sözlərinə görə, bu, Siyəzəndəki qaz kompressor stansiyasında aparılmış bərpa işləri sayəsində mümkün olacaq. İşlər Rusiyaya ixrac edilən qazın gələcəkdə tələb olunan həcmini və təzyiqini təmin etmək məqsədi ilə aparılıb.
2010-cu ildə ARDNŞ Rusiyaya 799,75 milyon kubmetr qaz ixrac edib. Ötən ilin dekabrında RF-yə 40,32 milyon kubmetr Azərbaycan qazı ixrac olunub. Bu göstərici noyabrda 60,8 milyon kubmetr təşkil edib.
Azərbaycan qazının Rusiyaya alqı-satqısı üzrə ortamüddətli müqavilə 2009-cu il oktyabrın 14-də Bakıda imzalanıb. 2010-2014-cü illəri əhatə edən müqavilə ARDNŞ ilə "Qazprom" şirkəti arasında imzalanıb. Bu ilin sentyabrında Bakıda imzalanan müqavilənin əlavəsinə uyğun olaraq, 2011-ci ildə "Qazprom" iki milyard kubmetr, 2012-ci ildə isə iki milyard kubmetrdən çox qaz alacaq.
Rusiyaya Azərbaycan qazının tədarükünə ötən il yanvarın 1-dən başlanılıb.
