Azərbaycan, Bakı, 10 fevral /Trend, müxbir E.İsmayılov/
ARDNŞ-nin (Azərbaycan Respublikası Dövlət Neft Şirkəti) Heydər Əliyev adına neft emalı zavodu istehsal edilən dizel yanacağının keyfiyyətinin yaxşılaşdırılması və onun Avro-3 ekoloji standartlarına uyğunlaşdırılması üzrə işləri davam etdirir. Bu barədə cümə axşamı neft-qaz bazarındakı mənbə deyib.
Bu fəaliyyətə dizel yanacağının istehsalı üzrə tədqiqatlar, eləcə də istehsalın Avro-3 standartlarına uyğunlaşdırılması üçün lazım olan işlər daxildir.
"İndi zavodun imkanlarına və dizel yanacağının keyfiyyətinin Avro-3 standartlarına çatıdırılması üçün görüləcək tədbirlərə aid rəsmi raportun hazırlanması üzrə işlər davam etdirilir", - mənbə bildirib.
Onun sözlərinə görə, hazırda ARDNŞ-nin istehsal etdiyi dizel yanacağı Avro-2 standartlarına uyğundur. ARDNŞ Avro-3 standartlarına uyğun olan dizel yanacağının istehsalına 2011-ci ilin sonunadək başlamağı planlaşdırır.
ARDNŞ-nin yüksəkvəzifəli nümayəndəsinin dediyi kimi, dizel yanacağının Avro-3 standartları üzrə istehsalı xüsusilə katalizatorların dəyişilməsi hesabına mümkün olacaq və şirkətə 10 milyon dollara başa gələcək.
2010-cu ildə ARDNŞ 2,42 milyon ton dizel yanacağı istehsal edib. Bu göstərici 2009-cu ildə 2,22 milyon ton olub.
