Azərbaycan, Bakı, 19 ferval /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) yaxın vaxtlarda Gobustan Operating Company-nin (GOC) işlədiyi "Hacıvəli" quru yatağında ikiölçülü geofiziki tədqiqatları başa çatdıracaq. Bu barədə şənbə günü Trend-ə ARDNŞ-dəki mənbə məlumat verib.
Müqavilə ərazisi ümumi sahəsi 604 kvadrat kilometr olan üç blokdan ibarətdir. Bu bloklara əvvəllər işlənmiş "Şıxzakirli", "Şeynatud", "Vürküt", "Donuzluq", "Nardaran", "İlxıçı", "Qərbi Hacıvəli", "Sundi", "Şərqi Hacıvəli", "Turağay", "Kənizdağ", "Qərbi Duvannı", "Duvannı", "Solaxay" və "Daşgil" yataqları daxildir.
Mənbənin sözlərinə görə, hazırda hava şəraiti işləri başa çatdırmağa imkan vermir.
"Hava şəraiti imkan verən kimi, az qalan səhra işləri başa çatacaq", - mənbə bildirib.
O həmçinin qeyd edib ki, ARDNŞ yalnız geofiziki tədqiqatlar aparır, işlərin yerdə qalan hissəsi isə sifarişçi şirkət tərəfindən həyata keçiriləcək.
ARDNŞ ilə imzalanan PSA tipli müqavilə çərçivəsində "Cənub-Qərbi Qobustan" yatağının işlənməsi ilə "Qobustan Əməliyyat Şirkəti" (GOC) məşğul olur. GOC-da 80 faiz iştirak "Commonwealth Gobustan Limited" şirkətinə, 20 faiz isə ARDNŞ-yə məxsusdur.