Azərbaycan, Bakı, 2 mart /Trend, müxbir E.İsmayılov /
2010-cu ildə BP operatoru olduğu "Azəri-Çıraq-Günəşli" ( AÇG ) yataqlar blokunda 58 hasilat quyusu istismarda olub. Bu barədə BP şirkətinin çərşənbə günü ötən ilin yekunları üzrə yaydığı rəsmi hesabatında deyilir. Həmin dövr ərzində blokdan 40,6 milyon ton (300,4 milyon barel) neft hasil edilib.
AÇG-nin işlənməsi layihəsinin operatoru olduğu BP-nin məlumatında deyildiyi kimi, ötən ilin yekunları üzrə "Çıraq" yatağında 15 quyu (on hasilat və beş subasma quyusu) istismarda olub, yataqdan orta sutkalıq hasilat 93,2 min barelə yaxın təşkil edib.
"Mərkəzi Azəri" yatağında 17 quyu (12 hasilat və beş qazbasma) fəaliyyət göstərib. 2010-cu il ərzində bu yataqda orta sutkalıq hasilat 205,3 min barel təşkil edib.
"Qərbi Azəri" yatağında 20 quyu (15 hasilat və beş subasma) fəaliyyət göstərib. Bu dövr ərzində bu yataqda orta sutkalıq hasilat təxminən 248,2 min barel təşkil edib.
"Şərqi Azəri" yatağında 13 quyu (9 hasilat və 4 subasma) fəaliyyət göstərib. Ötən il ərzində bu yataqda orta sutkalıq hasilat təxminən 140,7 min barel təşkil edib.
Dərinsulu "Günəşli"də 23 quyu (12 hasilat və 11 subasma) fəaliyyət göstərib, orta sutkalıq hasilat isə təxminən 135,6 min barelə yaxın olub.
"Azəri-Çıraq-Günəşli" yataqlar blokunun səhmdarları bunlardır: bp (operator - 34,1%), "Chevron" (10,2%), ARDNŞ (10%), INPEX (10%), "StatoilHydro" (8,6%), "ExxonMobil" (8%), TRAO (6,8%), "Devon" (5,6%), ITOCHU (3,9%), "Hess" (2,7%).
