Azərbaycan, Bakı, 12 mart /Trend, müxbir E.İsmayılov/
2010 -cu ildə ARDNŞ (Azərbaycan Respublikası Dövlət Nefet Şirkəti) həm daxili bazarda, həm də ixrac üçün 8,1 milyard kubmetr qaz satıb. Bu barədə hökumətin ötən ilin yekunları üzrə hesabatında deyilir.
Ötən il ARDNŞ-nin satdığı qazın ümumi həcmindən daxili bazarın payına 466,5 milyon manat həcmində 6,97 milyard kubmetrə yaxın qaz düşüb. ARDNŞ-nin ixrac əməliyyatları 210,6 milyon manat həcmində 1,14 milyard kubmetrə yaxın qaz təşkil edib.
Ötən il daxili bazarda satılan qazın ümumi həcmindən təxminən 4 milyard kubmetr "Azərenerji" ASC-yə (Azərbaycanda elektrik enerjisinin istehsalı və paylanması), 1,7 milyard kubmetrə yaxın respublika əhalisinə, 1,3 milyard kubmetrə yaxın isə digər abonentlərə göndərilib.
ARDNŞ-in ötən il ixrac etdiyi qazın ümumi həcmindən 799,7 milyon kubmetr Rusiyanın, yerdə qalan 339,2 milyon kubmetr isə Gürcüstanın payına düşüb.
2010-2011-ci illərdə payız-qış mövsümündə qaz istehlakçılarının tələbatının ödənilməsi üçün Azərbaycanın yeraltı qaz anbarlarına 1,9 milyard kubmetrdən artıq qaz vurulub.
