Azərbaycan, Bakı, 16 mart /Trend, müxbir E.İsmayılov/
Avropa İttifaqı, Azərbaycan və Türkiyə "Cənub qaz dəhlizi" layihəsi çərçivəsində iki normativ sənəd hazırlayacaqlar. Trend-in məlumatına görə, bu barədə çərşənbə günü Azərbaycanın sənaye və energetika naziri Natiq Əliyev deyib.
Onun sözlərinə görə, birinci sənəd - siyasi bəyannamə - siyasi xarakter daşıyacaq. Bu sənəddə tərəflər növbəti dəfə "Cənub qaz dəhlizi"nin yaradılamsı çərçivəsində öz niyyətlərini təsdiqləyəcəklər.
İkinci sənəd Azərbaycan və Türkmənistan arasında hökumətlərarası saziş olacaq və sazişdə Avropa İttifaqı müşahidəçi qismində çıxış edəcək.
Bu sənəddə Azərbaycan və Türkmənistanın "Cənub qaz dəhlizi"nin inkişafı məqsədilə Xəzərin dibi ilə Transxəzər qaz kəmərinin çəkilməsi layihəsi çərçivəsində səlahiyyət və öhdəlikləri müəyyənləşdiriləcək.
Bu sənədlərin hazırlanmasında Avropa İttifaqının, habelə Azərbaycan və Türkmənistanın aidiyyəti qurumlarının, xüsusilə də Azərbaycan Sənaye və Energetika və Xarici İşlər nazirliklərinin, eləcə də ARDNŞ-nin mütəxəssisləri iştirak edəcəklər.
"Cənub qaz dəhlizi haqqında Birgə Bəyannamə" Azərbaycan Prezidenti İlham Əliyev və Avropa Komissiyasının sədri Joze Manuel Barrozu tərəfindən cari il yanvarın ortalarında Avropa Komissiyası sədrinin Azərbaycana səfəri çərçivəsində imzalanıb.
Ererji tədarükünün mənbə və marşrutlarını diversifikasiya edəcək və bununla da Aİ-nin enerji təhlükəsizliyini artıracaq "Cənub dəhlizi" layihəsi Avropa İttifaqı üçün prioritet enerji layihələrindən biridir. "Cənub dəhlizi" layihəsinə aiddir: "Nabukko" qaz kəməri, Transadriatik qaz kəməri (TAP), "Ağ axın", ITGI (Türkiyə-Yunanıstan-İtaliya qaz kəməri).
Türkmənistandan Azərbaycana Transxəzər qaz kəmərinin tikintisi "Cənub dəhlizi"nin marşrutlarını türkmən qazı ilə təmin etməyə imkan verəcək.