Azərbaycan, Bakı, 29 mart /Trend, müxbir A.Axundov/
Türkiyənin boru kəməri şirkəti "Özbal Çelik Boru" "Nabukko" layihəsinin borulara olan ehtiyacının azı 15 faizini ödəməyi planlaşdırır. Bu barədə Trend-ə çərşənbə axşamı telefonla şirkətin idarə heyətinin sədri Yücehan Öztüre deyib.
"Bizim istehsal həcmimiz "Nabukko" qaz kəmərini borularla tam təmin etməyə imkan verir. Biz tenderdə iştirak edəcəyik və azı 15 faiz əldə edəcəyimizi planlaşdırırıq", - Öztüre bildirib.
Onun sözlərinə görə, "Özbal Çelik Boru" maliyyə və texniki baxımdan "Nabukko"nun borulara olan ehtiyacını ödəmək iqtidarında olan şirkətdir.
Ötən həftə Mersin şəhərində şirkət özünün üçüncü zavodunu açıb. Öztürenin sözlərinə görə, tikintisinə 20 milyon dollar investisiya yatırılan yeni zavodun istehsal gücü ildə 150 min ton təşkil edəcək.
2010-cu ilin iyulunda Xəzər regionundan və Yaxın Şərqdən Aİ ölkələrinə qaz nəql edəcək "Nabukko" qaz kəməri boru alışına tenderi təxirə salıb.
"Nabukko" qaz kəmərinin tikintisi üçün uzunmüddətli istifadə mallarının (boru, boru kəməri armaturu) tədarükünə dair təsnifat tenderinin başlanmasını layihə konsorsiumu apreldə elan edib. Tender paketinin ümumi dəyəri 3,5 milyard avro təşkil edir.
Boru kəmərinin tikintisi 2012-ci ilə nəzərdə tutulub, kəmərlə ilk tədarük 2015-ci ildə gözlənilir. Kəmərin maksimal gücü ildə 31 milyard kubmetr təşkil edəcək. Layihənin iştirakçıları OMV Gas GmbH (Аvstriya), BOTAŞ (Türkiyə), Bulgargaz (Bolqarıstan), S.N.T.G.N. Transgaz S.A. (Rumıniya), MOL Natural Gas Transmission Company Ltd. (Macarıstan) və RWE-dir (Almaniya).
Layihənin reallaşdırılmasının birinci fazasında əsas qaz tədarükçüləri kimi Azərbaycan və İraq nəzərdə tutulur, onların hər birindən müvafiq olaraq 8-10 və 8 milyard kubmetr qaz gözlənilir. Sonradan Türkmənistan qazının da layihəyə qoşulması planlaşdırılır.
