Azərbaycan, Bakı, 8 aprel /Trend, müxbirlər İ.Xəlilova, E.İsmayılov/
Hazırda ARDNŞ "Azərikimya" İstehsalat Birliyində infrastrukturunun genişləndirilməsi və istehsalın artırılması proqramını müzakirə edir. Bu barədə cümə günü Trend-ə İB rəhbəri Muxtar Babayev deyib.
Onun sözlərinə görə, proqram 2011-2015-ci illəri əhatə edir və iki hissədən ibarətdir. İlk hissə 2011-2013-cü, ikincisi 2013-2015-ci illərdir.
Proqramın əsas istiqaməti emal gücünün, tədarük edilən xammalın artırılması və xammal bazarının genişləndirilməsidir.
Babayevin sözlərinə görə, bu il üçün nəzərdə tutulan işlər çərçivəsində İB müəssisələrin balansında olan qurğuların tədqiqinə başlayıb. Xüsusilə, şirkət Rusiyanın əvvəllər Etilen-Polietilen zavodunun layihələşdirilməsi ilə məşğul olmuş iki iri layihə institutuna müraciət edib.
"Biz onlara qurğularımızın tam tədqiq edilməsinə görə müraciət etmişik. Onlar artıq bu işə başlayıblar. Yəni ilin ortalarına, təxminən avqusta kimi bizim nə dəyişə biləcəyimiz və nə qədər və haraya investisiya etmək barədə təsəvvürə malik olacağıq ki, yaxın bir-iki ildə və gələcək perspektivdə prosesi maksimal optimallaşdıraq", - Babayev qeyd edib.
O, 2011-ci il üçün nəzərdə tutulan digər işlər arasında Etilen-Polietilen zavodunun təmiri, qablaşdırma sisteminin və yeni soyutma və azot oksidinin hazırlanması qurğularının tikintisini sadalayıb.
ARDNŞ-nin İB-də aşağıtəzyqili polietilen və propilenin istehsalı üzrə iki yeni qurğunun tikintisi üzrə planları çərçivəsində danışıqlar da aparılır. Bu, buraxılan məhsulun çeşidini genişləndirməyə və hazır məhsulun istehsalı üçün əlavə baza təqdim etməyə imkan verəcək.
Babayevin sözlərinə görə, hazırda İB-nin müəssisələrində təmir işlərinin aparılması üçün ARDNŞ şəxsi vəsait qoyuluşları ilə kifayətlənir. Lakin yeni iri qurğular və zavodların tikiləcəyi halda əlavə vəsaitlər lazım olacaq. Bu isə investisiya müsabiqəsi əsasında müəyyənləşdiriləcək.