Azərbaycan, Bakı, 26 may /Trend/
Oktyabrın 1-nə Azərbaycan qazının Avropaya tədarükünə yönələn əlavə boru kəməri layihələri çərçivəsində göndərilmə tarifləri müəyyən edilməlidir. Trend-in məlumatına görə, bu barədə jurnalistlərə ARDNŞ-nin prezidenti Rövnəq Abdullayev deyib.
Onun sözlərinə görə, bü müddət ərzində ARDNŞ qaz tədarükünün əlavə marşrutlarını da müəyyənləşdirəcək.
"Hazırda Azərbaycan qazının alıcıları ilə danışıqlar davam edir", - şirkət rəhbəri qeyd edib.
ARDNŞ mütəxəssisləri "Nabukko" layihəsi ilə danışıqlar aparırlar. Bununla əlaqədar hazırda bir sıra məsələlər, o cümlədən qazın göndərilməsinə aid tariflərin müəyyənləşdirilməməsi həll edilməmiş qalır.
"Oxşar problemlər digər boru kəməri layihələri ilə də əlaqədardır. Tariflər müəyyənləşdirildikdən sonra Azərbaycan qazının göndərilməsinin marşrutunun seçilməsi üzrə son qərarı qəbul etmək olar", - Abdullayev əlavə edib.
Planlaşdırılan "Nabukko" qaz kəməri "Cənub dəhlizi"nin tərkibinə daxildir. O, ererji tədarükünün mənbə və marştutlarını diversifikasiya edəcək və bununla da Aİ-nin enerji təhlükəsizliyini artıracaq. "Cənub dəhlizi" layihəsinə aiddir: "Nabukko" qaz kəməri, Transadriatik qaz kəməri (TAP), "Ağ axın", ITGI (Türkiyə-Yunanıstan-İtaliya qaz kəməri).
Hazırda Azərbaycan "Şahdəniz" yatağından olan qazını Cənubi Qafqaz boru kəməri ilə Gürcüstan və Türkiyəyə tədarük edir.
