Azərbaycan, Bakı, 20 iyul /Trend, müxbir E.İsmayılov/
ARDNŞ-nin Geofizika və Geologiya İdarəsi Sənqəçal neft terminalının genişləndirilməsi ilə bağlı öz təkliflərini təqdim edib. Bu barədə çərşənbə günü ARDNŞ-dəki mənbə deyib.
Onun sözlərinə görə, bir sıra aidiyyəti qurumlar tərəfindən təqdim edilən təkliflərə baxılacaq.
"İdarə tərəfindən terminalın genişləndirilməsi üçün lazım olan işlərə aid təkliflər təqdim edilib. Bundan başqa, digər qurumların da təklifləri təqdim edilib. Bütün təkliflərə baxılacaq", - mənbə bildirib.
Bundan əvvəl Sənqəçal terminalının genişləndirilməsi çərçivəsində Geofizika və Geologiya İdarəsi mühəndis-geoloji quyuların qazılmasını başa şatdırıb. Quyuların qazılması "Kamaz LBU-50" qazma qurğusundan istifadə etməklə "Azeri-Fugro" MMC ilə bağlanmış müqavilə əsasında həyata keçirilib.
Sənqəçal neft terminalı Xəzərin Azərbaycan sektorunda "Azəri-Çıraq-Günəşli" neft-qaz yataqlar blokunun işlənməsi layihəsi çərçivəsində hasil edilən neft və qazın nəql edilməsinin təmini məqsədilə tikilib. Blokda hasil ediləm neft terminaldan Bakı-Tbilisi-Ceyhan, Bakı-Supsa neft kəməri və dəməryolu ilə nəql edilir.
Bundan başqa, terminal vasitəsilə "Şahdəniz" qaz-kondensat yatağında hasil edilən qazın nəqli həyata keçirilir.
