Azərbaycan, Bakı, 25 iyul /Trend, müxbir S.Əliyev/
"Azəri-Çıraq-Günəşli" yataqlar blokunun işlənməsi layihəsinin operatoru olan BP şirkəti "Çıraq" platformasında quyularda geoloji-texniki tədbirləri başa çatdırır. Bu tədbirlərlə əlaqədar iyulun 10-dan platformada neft hasilatı tam dayandırılmışdı. Bu barədə bazar ertəsi "BP Azerbaijan" şirkətindən deyiblər.
"Quyularda tədqiqatlar və platformada avadanlığın dəyişdirilməsi yaxın iki gün ərzində başa çatdırılacaq. Bundan sonra platforma yenidən istifadəyə veriləcək", - şirkətdən bildiriblər.
Hasilat dayandırılmamışdan əvvəl onun həcmi sutkada 90 min barelə yaxın olub.
"Çıraq" platformasında işlər başa çatdırıldıqdan sonra anoloji işlər "Azəri" (dörd platforma) yatağında quraşdırılan platformalarda aparılacaq. Bu işlərə də iki həftə vaxt lazım olacaq.
Nəzərdə tutulur ki, bu uzunmüddətli dayanma, eləcə də təmir işləri nəticəsində cari il ərzində Azərbaycanda ümumi neft hasilatı proqnozlaşdırılan 52 milyon tondan təxminən 4 milyon ton azalacaq.
Yataqların işlənməsinə dair müqavilə 1994-cü ildə bağlanıb.
Hazırda müqavilədə iştirak payı bu şəkildə bölüşdürülüb: BP (operator - 35,83 faiz), "Chevron" (11,27 faiz), AzAÇG (11,6 faiz), "Inpex" (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).
2010-cu ildə "Azəri-Çıraq-Günəşli" yatağında 40,6 milyon ton neft hasil edilib. Bu göstərici 2009-cu ildə 40,3 milyon ton olub. 2010-cu ildə bu yataqlar blokunda sutkalıq orta hasilat 823,1 min barel təşkil edib.
