Azərbaycan, Bakı, 22 avqust /Trend, müxbir E.İsmayılov/
Yanvar-iyunda Azərbaycanın dəniz yataqlar bloku "Azəri-Çıraq-Günəşli"də 60 hasilat quyusu istismarda olub. Bu barədə layihənin operatoru qismində çıxış edən BP-nin hesabatında deyilir. Bu dövrdə ümumilikdə, AÇG-də19 milyon ton neft hasil edilib (140,4 milyon barel).
"Çıraq" yatağında istismarda 11 quyu olub və bu dövrdə yataqda sutkalıq hasilat 78,7 min barelə yaxın təşkil edib.
"Mərkəzi Azəri" yatağında 18 quyu işləyib (12 hasilat, 5 qazvurma və bir suvurma). İlin birinci yarısında bu yataqda orta sutkalıq hasilat 216,1 min barel olub.
"Qərbi Azəri" yatağında istismarda 20 quyu olub (14 hasilat və 6 suvurma). Hesabat dövründə burada orta sutkalıq hasilat, təxminən, 218,6 min barel təşkil edib.
"Şərqi Azəri" yatağında 15 quyu istismar edilib (11 hasilat və 4 suvurma). Yanvar-iyun ərzində sutkalıq hasilat 131,9 min barel təşkil edib.
Dərin sularda yerləşən "Günəşli"də istismarda 21 quyu olub (12 hasilat və 9 suvurma) və sutkalıq hasilat 130,4 min barelə yaxın olub.
"Azəri-Çıraq-Günəşli" yataqlar blokunda hasilatın pay bölgüsü barədə saziş 1994-cü ildə imzalanıb. Layihənin iştirakçıları aşağıdakılardır: BP (operator - 35,83 faiz iştirak payı), "Chevron" (11,27 faiz), AzACG (11,6 faiz), INPEX (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).
