ARDNŞ tərəfdaşları ilə quruda ən dərin quyuların qazılmasına başlayır

Azərbaycan, Bakı, 22 sentyabr /Trend, müxbir E.İsmayılov/

Azərbaycan Respublikası Dövlət Neft Şirkəti (ARDNŞ) və ABŞ-ın "ConocoPhilips" şirkəti Azərbaycanın şimal regionlarında mezozoy təbəqələrində tədqiqatlar aparır. Trend-in məlumatına görə, bu barədə cümə axşamı jurnalistlərə ARDNŞ-nin geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadə deyib.

Onun sözlərinə görə, hazırda ABŞ şirkətinin mütəxəssisləri əvvəllər qazılmış quyulardan məlumat əldə edərək onları öyrənirlər. Həmçinin, burada üçmiqyaslı seysmik araşdırmalar aparılır və əldə olunan məlumatların ümumiləşdirilməsindən sonra qazma üçün yerlər seçiləcək.

Yusifzadə deyib ki, əvvəllər bu yerlərdə, o cümlədən "Muradxanlı" yatağında qazma işləri aparılıb, lakin geoloji quruluşun çətinliyi və quyuların qeyri-stabil debitinə görə işlər dayandırılıb.

Xarici şirkətlər belə yataqlarda iş aparmağa maraq göstərirlər. Onlar mezozoy təbəqələrinin açılaraq karbohidrogen hasilatı üçün quyunun qazılmasına dair təklif və texnologiya təqdim edəcək.

Onun sözlərinə görə, bu təbəqələrin yerləşmə dərinlikləri minimal dərinlikdən 10 min metrə qədərdir. Mezozoy təbəqələrindəki ehtiyatların qiymətləndirilməsi çətindir, çünki indiyədək uzunmüddətli stabil debiti olan quyu yoxdur.

Cari ilin iyul ayında ARDNŞ və "ConocoPhilips" "Azərbaycan quru ərazisində kəşfiyyatqabağı işlər çərçivəsində müştərək tədqiqatlar aparmaq haqqında saziş" imzalayıb. Saziş şirkətin nümayəndə heyətinin ölkəyə səfəri zamanı ARDNŞ prezidenti Rövnəq Abdullayev və ConocoPhilips-in birinci vitse-prezidenti Larri Arçibald tərəfindən imzalanıb.