Azərbaycan, Bakı, 5 oktyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) neft-qaz hasilatı və emalı nəticəsində Xəzər dənizinin çirklənməsi prosesini nəzarət altına alıb. Bu barədə çərşənbə günü jurnalistlərə ARDNŞ-nin prezidenti Rövnəq Abdullayev məlumat verib.
"Xəzərin çirklənməsinin qarşısının alınması və minimallaşdırılması ARDNŞ-nin əsas vəzifələrindən biridir. Həmçinin, görülən tədbirlər və xüsusi təmizləyici qurğuların işə başlaması nəticəsində neft emalı zavodlarından dənizə atılan suyun keyfiyyəti dövlət standartlarına uyğun vəziyyətə gətirilib", - Abdullayev deyib.
O bildirib ki, şirkət müəyyən qədər dənizin çirklənməsinin qarşısını almaq imkanına malikdir və bu sahədə daim iş aparılır.
Onun sözlərinə görə, hazırda ekoloji tədbirlər proqramı hazırlanır, habelə şirkət yataqlarda və dəniz obyektlərində çirklənmə mənbələrini müəyyən etmək məqsədilə müntəzəm olaraq monitorinqlər aparır, bununla da Xəzərdəki ekoloji vəziyyəti tam nəzarətə götürür.