Azərbaycan, Bakı, 31 oktyabr /Trend, müxbir E.İsmayılov/
ARDNŞ-nin (Azərbaycan Respublikası Dövlət Neft Şirkəti) dünyanın qabaqcıl reytinq agentlərindən reytinqlər alması şirkətin beynəlxal imicinin yüksəlməsi üçün lazımdır. Trend-in məlumatına görə, bu barədə bazar ertəsi ARDNŞ prezidenti Rövnəq Abdullayev AzTV-yə müsahibəsində Dövlət Neft Şirkətinin "Standard & Poor's" agentliyi tərəfindən "BB" reytinqi alması barədə sualı cavablandırarkən deyib.
ARDNŞ eləcə də "Moody's" və "Fitch" reytinq agentliklərinin reytinqlərinə sahibdir.
Onun sözlərinə görə, beynəlxalq agentliklərdən reytinqlər alınması ARDNŞ-nin etibarlılığının göstəricisidir.
"Bu, həmçinin bizim beynəlxalq biznesimizə müsbət təsir edir", - ARDNŞ rəhbəri deyib.
Abdullayevin sözlərinə görə, reytinqlərin alınması ARDNŞ-yə ona görə lazımdır ki, şirkət fəaliyyətini təkcə Azərbaycan ərazisində deyil, eləcə də bir sıra beynəlxalq layihələrdə həyata keçirir.
ARDNŞ Azərbaycanın Dövlət Neft Şirkətidir. 2010-cu ildə ARDNŞ neft-qaz çıxarma idarələri tərəfindən 7,28 milyon ton neft və 7 milyard kubmetrdən çox qaz hasil edilib.
ARDNŞ ölkədə neft məhsullarının yeganə istehsalçısıdır (balansında iki NEZ-ə malikdir), eləcə də Azərbaycanda, Gürcüstanda və Ukraynada yanacaqdoldurma məntəqələrinə malikdir. ARDNŞ Türkiyənin ən iri neft-kimya kompleksi olan "Petkim"in ortaq sahibidir. Özünün ticarət bölməsi olan "SOCAR Trading" şirkəti vasitəsilə dünyanın müxtəlif regionlarında neft ticarəti həyata keçirir.
ARDNŞ-nin tərkibinə "Azneft" İB (quruda və dənizdə neft və qaz hasilatı müəssisəsi), "Azərikimya" İB (kimya sənayesi müəssisəsi),"Azəriqaz" (qazın paylanması) müəssisəsi daxildir.