Azərbaycan, Bakı, 6 fevral /Trend, müxbir E.İsmayılov /
Fevralın 6-na olan məlumata görə, ölkənin yeraltı qaz anbarlarından götürülən qazın sutkalıq həcmi 19,37 milyon kubmetrə yaxın təşkil edib. Bu göstərici yanvarın 23-də 15 milyon kubmetr olub. Bu barədə Trend-ə bazar ertəsi ARDNŞ-dəki mənbə məlumat verib.
Azərbaycan ərazisində iki - Qalmaz və Qaradağ yeraltı qaz anbarı var.
Mənbənin sözlərinə görə, yeraltı qaz anbarlarından götürülən qazın həcminin artması Azərbaycan ərazisində kəskin hava şəraiti ilə əlaqədar tələbatın artması ilə bağlıdır.
"Ölkə ərazisində hava şəraiti kifayət qədər sərtdir, bu da qaza olan tələbata təsir edib. Tələbatın təmin olunması məqsədilə anbarlardan sutkada 19,368 milyon kubmetr qaz götürülür", - mənbə deyib.
Onun sözlərinə görə, hazırda ölkənin yeraltı qaz anbarlarından götürülən qazın ümumi həcmindən 9,53 milyon kubmetrə yaxını Qaradağ qaz anbarının, 9,84 milyon kubmetri isə Qalmaz qaz anbarının payına düşür.
Mövsümün yekunu üzrə yeraltı qaz anbarlarına 2010-cu ildəki 3,05 milyard kubmetrə qarşı 3,25 milyard kubmetr qaz vurulub.