Azərbaycan, Bakı, 4 aprel /Trend, müxbir A.Axundov/
ARDNŞ-nin (Azərbaycan Respublikası Dövlət Neft Şirkəti) Ukraynada planlarının həyata keçirilməsinə maksimum dəstək göstəriləcək. Trend-in məlumatına görə, bu barədə çərşənbə günü jurnalistlərə Ukrayna xarici işlər nazirinin müavini Viktor Mayko Bakıda keçirilən Azərbaycan-Ukrayna biznes forumunun yekunları üzrə bildirib.
"ARDNŞ-nin Ukraynada çox iddialı proqramı var. Şirkət yanacaqdoldurma məntəqələri şəbəkəsini genişləndirməyə, neft emalına vəsaitlər qoymağa və s. hazırlaşır", - nazir müavini qeyd edib.
Onun sözlərinə görə, ARDNŞ-nin Ukraynada gələcək işi üçün bütün zəruri şərait yaradılacaq.
Qeyd edək ki, hazırda Ukraynada SOCAR brendi altında 10-dan artıq YDM fəaliyyət göstərir. Kiyevdə 4, Kiyev vilayətində isə 2 YDM-in açılması da planlaşdırılır.
SOCAR brendi altında Lvovda 3, Lvov vilayətində isə 4 YDM-in açılması da qarşıdakı planlara daxildir.