Təfərrüatlar altıncı abzasdan sonra əlavə olunub (ilk xəbər 17:03-də yayılıb)
Azərbaycan, Bakı, 19 aprel / Trend müxbir E.İsmayılov/
ARDNŞ (Azərbaycan Respublikası Dövlət Neft Şirkəti) dünən Bakının Binəqədi rayonunda Sulutəpə yatağı ərazisində qanunsuz tikililərin sökülməsi ilə əlaqədar baş vermiş insidentin təfərrüatlarını aydınlaşdırır. Trend-in məlumatına görə, bu barədə cümə axşamı jurnalistlərə ARDNŞ-nin Hüquq İdarəsinin rəhbəri Eldar Orucov məlumat verib.
Onun sözlərinə görə, şirkətin yeddi əməkdaşının və daha iki şəxsin xəsarət aldığı insidentlə əlaqədar şirkətin vitse-prezidenti Mikayıl İsmayılovun başçılığı ilə xüsusi komissiya yaradılıb.
Orucov bildirib ki, əgər Dövlət Neft Şirkətinin işçilərinin günahı sübuta yetirilərsə, onlar məsuliyyətə cəlb ediləcəklər.
Onun sözlərinə görə, Binəqədi rayonu və konkret olaraq Sulutəpə ərazisi qanunsuz binaların fəal şəkildə tikildiyi yerdir. Bu da öz növbəsində neft-qaz əməliyyatlarının və karbohidrogenlərin hasilatının tam şəkildə aparılmasına mane olur.
Bu ərazilər "Binagadi oil" əməliyyat şirkətinə məxsusdur və qanunsuz tikililər səbəbindən yatağın işlənməsi layihəsinin iştirakçısı olan xarici tərəfdaş müqavilə çərçivəsində üzərinə götürdüyü öhdəlikləri yerinə yetirə bilmir. Orucov bildirib ki, öz növbəsində ARDNŞ bu müqavilələr üzrə dövlət zəmanətini reallaşdıra bilmir.
İndiyədək ARDNŞ tərəfindən sənaye təyinatlı torpaq sahələrində və neft quyularının təhlükəsizlik zonasında qanunsuz tikililərə malik şəxslər barəsində 15 min şikayət ərizəsi verilib.
"Çərşənbə günü mədən ərazilərində baş verən insident ARDNŞ işçilərinin hüquq-mühafizə orqanları ilə birlikdə qanunsuz tikintiyə mane olmaq niyyətləri ilə bağlı olub", - Orucov deyib.
Onun sözlərinə görə, ARDNŞ işçiləri öhdəliklərini yerinə yetirərkən qanunsuz tikililərin sahibləri tərəfindən aqressiv münasibət və güc tətbiqi ilə üzləşiblər.
"Son illərdə neft-qaz resurslarının işlənməsi üçün nəzərdə tutulan ərazilərdə qanunsuz tikililərin sayı xeyli artıb. Xüsusən ilin sonunadək ARDNŞ qanunsuz tikililər məsələsi üzrə məhkəmə orqanlarına müraciətlərin sayını 22 minə çatdırmaq niyyətindədir" , - o deyib.
Hesablamalara görə, neft-qaz obyektlərinin xüsusən quyu, çən və neft-qaz kəmərlərinin təhlükəsizlik zonasındakı mədən ərazilərində qanunsuz tikililərin sayı 30 mini ötür.
"Azərbaycan iqtisadiyyatı neft-qaz sektoruna əsaslandığına görə qanunsuz tikililər neft-qaz yataqlarının işlənməsini tam ölçüdə həyata keçirməyə imkan vermir. Bu da iqtisadiyyata böyük ziyan vurur", - Orucov qeyd edib.
Onun sözlərinə görə, özünü xəsarət alan adlandıran jurnalistlər qohumları ilə ARDNŞ işçiləri və hüquq-mühafizə orqanlarına qarşı təşkil edilən bu qarşıdurmanın iştirakçılarından biri olublar.