Azərbaycan, Bakı, 19 may /Trend, müxbir E.İsmayılov/
2014-cü ilin yanvar-aprel aylarında Azərbaycanın neft sektoruna 1,87 milyard manat investisiya yatırılıb ki, bu da ötən ilin müvafiq dövrünün göstəricisindən 32,1 faiz çoxdur. Trend-in məlumatına görə, bu barədə Dövlət Stsatistika Komitəsinin (DSK) 2014-cü ilin 4 ayının yekunu üzrə hesabatında deyilir.
2013-cü ildə ölkənin neft sektoruna 4,82 milyard manatdan çox investisiya qoyulub ki, bu da 2012-ci ilin göstəricisindən 24,2 faiz çoxdur.
Məlumata görə, yanvar-aprel aylarında Azərbaycanın sənaye sahələrinə kapital qoyuluşları ümumilikdə 2,27 milyard manat təşkil edib ki, bu da ötən ilin müvafiq dövrünün göstəricisindən 12,7 faiz çoxdur.
Bu vəsaitdən emal sənayesi sahəsinə 1,86 milyard manat həcmində investisiya qoyulub ki, bu da 2013-cü ilin eyni dövrü ilə müqayisədə 31,2 faiz çoxdur.
2013-cü ildə Azərbaycanın sənaye sahələrinə kapital qoyuluşları ümumilikdə 7,08 milyard manat təşkil edib ki, bu da 2012-ci ilin göstəricisindən 16,4 faiz çoxdur. Bu vəsaitdən emal sənayesi sahəsinə təqribən 4,7 milyard manat həcmində investisiya qoyulub ki, bu da 2012-ci ilin göstəricisi ilə müqayisədə 20,6 faiz çoxdur.
2014-cü ilin yanvar-aprel aylarında elektrik enerjisi, istilik və qaz istehsalına, paylanmasına və təchizatına yatırılmış investisiyaların həcmi 95,7 milyon manat təşkil edib. Bu da ötən ilin müvafiq dövrünün göstəricisindən 46,4 faiz çoxdur.
2013-cü ildə elektrik enerjisi, istilik və qaz istehsalına, paylanmasına və təchizatına yatırılmış investisiyaların həcmi 390,5 milyon manat təşkil edib ki, bu da 2012-ci ilin müvafiq dövrünün göstəricisindən 31,5 faiz azdır.
