Azərbaycan, Bakı, 30 iyul /Trend, müxbir Emil İsmayılov/
ARDNŞ (Azərbaycan Respublikası Dövlət Neft Şirkəti) 2014-cü ilin birinci yarısında Rusiyaya 100 milyon kubmetrə yaxın qaz ixrac edib. Bu barədə Trend-ə Dövlət Neft Şirkətindəki mənbə məlumat verib.
2013-cü ilin birinci yarısında ARDNŞ Rusiyaya 876 milyon kubmetr qaz ixrac etmişdi.
Agentliyin müsahibinin sözlərinə görə, ixrac həcmlərinin azalması Azərbaycandan Rusiyaya gedən qaz kəmərində aparılan təmir-bərpa işləri ilə bağlıdır. Qaz nəqli 2014-cü ilin yanvarında dayandırılmış və iyun ayında bərpa edilmişdi.
Mənbə bildirib ki, qazın verilişi təmir işləri ilə bağlı dayandırılmışdı, lakin hazırda Rusiyaya qaz ixracı normal rejimdə həyata keçirilir.
Qeyd edək ki, 2013-cü ildə ARDNŞ Rusiyaya 1,37 milyard kubmetr qaz ixrac edib.
