Azərbaycan, Bakı, 18 avqust /Trend, müxbir Emil İsmayılov/
Xəzərin Azərbaycan sektorundakı "Şahdəniz" qaz-kondensat yatağının işlənməsinin II mərhələsi üzrə qabaqlayıcı qazma işləri çərçivəsində artıq 5 quyu qazılıb.
Trend-in məlumatına görə, bu barədə BP-nin 2014-cü ilin I yarısında Azərbaycanda fəaliyyətinin yekunları üzrə hesabatında deyilir.
Hesabatda qeyd edilir ki, 2018-ci ilin sonuna layihə çərçivəsində ilk qazın əldə edilməsinə hazırlıq məqsədilə artıq 5 quyu qazılıb.
Yataqda quyuların qazılması "Heydər Əliyev" adına və "İstiqlal" üzən qazma qurğuları vasitəsilə aparılır. Hazırda "Heydər Əliyev" adına qazma qurğusu ilə SDD02 quyusunun qazılması davam edir. Quyunun qazılmasının cari ilin III rübünün sonuna başa çatdırılması planlaşdırılır.
"İstiqlal" qurğusu ilə II rübdə SDC04 quyusunun qazılmasına başlanılıb. Bu quyuda qazma əməliyyatlarının gələn ilin yanvarında yekunlaşdırılması gözlənilir.