Azərbaycan DRES-in 5-ci blokunun yenidən qurulması cari ilin sonunda başa çatdırılacaq.Bu barədə Trend ə "Azərenerji" SC-nin baş mühəndisi Marlen Əsgərov bildirib.
Onun sözlərinə görə, hazırda işlər razılaşdırılmış cədvəl üzrə aparılır. Azərenerji SC-nin podratçısı Rusiyanın "Silovıe maşinı" SC-dir.
Həmin aqreqatın yenidən qurulması onun texniki parametrlərinin yaxşılaşdırılmasına imkan verəcək.Blokun gücü layihə göstəricisinədək çatdırılıb, elektrik enerjisi vahidlərinin istehsalında yanacaq xərcinin göstəricisi isə xeyli azaldılacaq.
Modernləşdirmə AzDRES-in energetika avadanlığının hazırda 170 MVA təşkil edən gücünün 320-330 MVt -dək artırılmasına imkan verəcək. 1kVt/s istehsalı üçün yanacaq xərcləri 400 q-dan 350 q-dək azaldılacaq.
Respublikanın ən iri elektrik stansiyalarından biri olan Mingəçevirdəki Azərbaycan DRES ölkənin elektrik enerjisinin yarısını verir.AZ DRES-in XX əsrin 80-ci illərində tikilmiş fəaliyyətdə olan səkkiz enerji blokunun yenidən qurulması layihəsi "2005-2015-ci illərdə Azərbaycan Respublikasının yanacaq-energetika kompleksinin inkişafı Dövlət proqramı"ndav nəzərdə tutulub.Layihənin gerçəkləşdirilməsi, sənədə əsasən, 2005-2008-ci illərdə planlaşdırılıb.
Mütəxəssislərin qiymətləndirməsinə əsasən, hər bir aqreqatın təmiri üçün $15-17 mln.tələb olunur. Elektrik stansiyasında tüstü borularının və suyun soyudulması kanalının bərpa edilməsi zərurəti də nəzərə alınmaqla, ilkin hesablamalara görə, layihənin ümumi dəyəri $130-140 mln. həddində göstərilir.
