Oktyabrın 20-də Bakıda kiçik həcmli istilik istehsalı və texnologiyaları bazarları sahəsində yeniliklərə həsr olunmuş beynəlxalq konfrans öz işinə başlayıb. Bu barədə Trend məlumat verib.
Konfransda Fransa, Litva, Belçika, Azərbaycan, Ukrayna, Polşa, Rusiya, Avropa Yenidənqurma və İnkişaf Bankının ekspertləri iştirak edirlər. Tədbirin təşkilatçısı Amerikanın PA Consulting şirkətidir. Bu şirkət Azərbaycan hökumətinə ABŞ Beynəlxalq İnkişaf Agentliyinin (USAID) maliyyələşdirdiyi "Azərbaycanın energetika sektoruna texniki yardım göstərilməsi" layihəsi çərçivəsində konsaltinq xidmətləri göstərir.
Tədbirdə Mərkəzi və Şərqi Avropada rüblük istilik təminatı obyektlərinin idarə olunmasında özəl sektorun rolu, keçmiş SSRİ ölkələrində kiçik həcmli istilik təchizatı vasitələrinin yaradılmasındakı problemlər müzakirə olunacaq.
Azərbaycanın Sənaye və Energetika Nazirliyinin bölmə rəisi İslam İslamov Azərbaycanda istilik təchizatı mənbələrindən danışıb. Onun sözlərinə görə, SSRİ-nin dağılması ilə əlaqədar ölkənin istilik təchizatında böyük problemlər yaranıb. Bunun bir sıra obyektiv səbəbləri var. Belə ki, zəruri investisiyaların ayrılmaması ilə bağlı sistem tədricən dağılıb. Subyektiv amillər isə istilik təchizatının təşkilinin qeyri-mükəmməl strukturları və s. ibarətdir.
"Azərbaycanın enerji sektoruna texniki yardım göstərilməsi" layihəsinin işçi qrupunun üzvü İlham Mirzəliyev PA Government Servİce Inc. (PA Consulting Group-un tərkibinə daxil olan) şirkətinin Azərbaycanın istilik təsərrüfatındakı problemlərin həlli məqsədilə hazırladığı pilot layihə barədə danışıb.
Qeyd edək ki, oktyabrın 21-də keçmiş SSRİ ölkələrinə instutisional islahatlara həsr olunan konfrans keçiriləcək.
