2006-2007-ci illərdə Azərbaycan hökuməti Dünya Bankından enerji layihələrinə $250 mln kredit almağı planlaşdırır. Bu barədə Trend ə hökumətdən məlumat verilib. Bu həcmin $100 milyonunu elektrik enerji, $150 milyonunu isə qaz sektoruna yönəltmək planlaşdırılır.
"Prioritet istiqamətləri müəyyən etmək məqsədilə 2006-cı il üçün yeni enerji və qaz layihələrinin siyahısını dəqiqləşdirmək lazımdır. Dünya bankı belə layihələrin maliyyələşdirilməsində işitrak etməyə hazır olduğunu bildirir və biz konkret layihələri banka təqdim etməliyik", - deyə hökumətdə bildiriblər.
Kreditlərin Beynəlxalq Yenidənqurma və İnkişaf bankının şərtləri əsasında ayrılacağı gözlənilir.
Ölkə iqtisadiyyatının sürətli templərlə inkişafı ilə əlaqədar Beynəlxalq İnkişaf Agentliyi tərəfindən 10 il güzəştli müddətə və 0,75% dərəcəsi ilə ayrılan kreditlərin həcmi azalır. 2006-cı ildə Azərbaycan BİA-dan çox kiçik həcmdə kredit alacaq. Lakin onun kreditləri də sərfəlidir, belə ki, əgər kreditlər 20 il müddətinə ayrılırsa, güzəştli dövr 8 ildir, 25 il ərzində isə güzəştli dövr 5 il təşkil edir.