Azərbaycan Dövlət Neft Şirkəti "Azəri-Çıraq-Günəşli" layihəsi çərçivəsində onun 10%-lik payına düşən vəsaitlərin ödənilməsi üçün beynəlxalq kapital bazarında kredit alıb. Bu barədə Trend ə məlumatlı mənbələrdən xəbər verilib. Kreditin həcmi $750 milyondur.
Mənbədən bildirilir ki, əvvəllər vəsaitinin olmaması ilə əlaqədar AR DNŞ-ə AÇG layihəsinin iki iştirakçısı- Amerikanın ExxonMobil və Türkiyənin TPAO şirkətləri sərmayə qoyurdu. "Bundan sonra AR DNŞ özü cash call (ABƏŞ) əsasında layihəyə lazımi vəsait ayıracaq", - deyə mənbədən qeyd edilib.
Kredit BNP Paribas SA tərəfindən 5 il müddətinə ayrılıb. Faiz dərəcəsi açıqlanmır.
"Bu, əvvəllər sərfəli şərtlərlə kredit ala bilməyən AR DNŞ-ə sərmayənin cəlb olunması deməkdir. Azərbaycanın neft sektoru inkişaf etdikcə, AR DNŞ dünya bazarında effektiv tərəfdaş kimi çıxış edir", - deyə mənbədən bildirilib.
