BTC Co-nun Direktorlar Şurasının aprelin 13-də Bakıda keçirilmiş iclasında Bakı-Tiflis-Ceyhan ixrac boru kəmərinin tikintisi layihəsinin gerçəkləşdirilməsi ilə bağlı məsələlər, o cümlədən kəmərin Türkiyə hissəsinin inşası və doldurulması istiqamətindəki vəziyyət müzakirə olunub. Hazırda texniki neft Türkiyə ərazisindəki 3-cü nasos stansiyasındadır. Yaxın vaxtlarda bu neft 4-cü nasos stansiyasına nəql olunacaq. Bu barədə Trend ə layihənin operatoru olan BP Azerbaijan şirkətindən məlumat verilib.
Şirkət nümayəndələrinin sözlərinə görə, Ceyhan limanından birinci tankerin yola salınma müddəti dəyişməz olaraq qalır. Bu proses 2006-cı il mayın sonlarında həyata keçiriləcək.
Şirkətdən bildirilib ki, tikinti zamanı Türkiyənin Botas şirkəti ilə yaranmış kommersiya məsələlərinin də müzakirəsi davam etdirilir. "Bu məsələlər hələ ötən ildən müzakirə edilir", - deyə şirkətdən qeyd olunub.
Hazırda kəmərin Türkiyə hissəsinin inşasını həyata keçirən Botas şirkəti BTC Co-ya $400 mln məbləğində iddia irəli sürüb. Şirkət bildirir ki, tikinti işləri zamanı kəmərin marşrutuna dəyişikliklər edilib, BTC CO ilə bağlı olmayan ləngimələr olub, əlavə avadanlıqlar alınıb ki, bunlar da dəyərin artmasına səbəb olub.
Digər podratçılar da BTC Co-ya qarşı maliyyə iddiası ilə çıxış edir. Bu iddialara baxılacaq və əsaslı olduğu halda həmin vəsaitlər ödəniləcək.
