İki alyansda birləşmiş dörd şirkət Azərbaycan YES-in yenidənqurulma layihəsində texniki məsləhətçi qismində iştirak etmək istədiklərini bildiriblər. Trend in xəbər verdiyi kimi, bu barədə "Azərenerji" səhmdar cəmiyyətinin mətbuat xidmətindən bildiriblər. Birinci alyansa Almaniyanın DECON və Vattenfall, ikinciyə isə Almaniyanın Fichtner və Yaponiyanın TEPCO şirkətləri daxildir.
Məsləhətçinin seçimi üzrə son qərarı bu layihəni maliyyələşdirən Avropa Yenidənqurma və İnkişaf Bankı verəcək. Məsləhətçinin seçimi iyulun sonuna qədər başa çatacaq. Məsləhətçinin vəzifələrinə müsabiqə təsnifatının hazırlığı üzrə tədbirlər, baş podratçının müəyyən olunması üçün tenderin keçirilməsi, işlərin icrasına nəzarət daxil olacaq.
Avropa Bankının Direktorlar şurası iyunun sonunda stansiyanın yenidənqurulması üçün "Azərenerji"yə kreditin ayrılması fikrini təsdiqləyib. Bu məqsədlə standart şərtlərlə (15 il müddətinə, üç il gecikməklə ödəniş və Libor + 1% faiz dərəcəsi ilə) 115 milyon ABŞ dolları veriləcək.