Azərbaycan Dövlət Neft Şirkətinin "Şahdəniz" layihəsində vəsait qoyma imkanının əldə olunmasına görə alacağı kredit üzrə faiz dərəcəsi 1%-dən az olmayacaq. Bu barədə layihənin 10%-nə malik ARDNŞ-dən Trend ə bildiriblər.
"Bəzi Avropa bankları tərəfindən "Azəri-Çıraq-Günəşli" layihəsində vəsait qoyma imkanının əldə olunmasına görə ARDNŞ-ə ilk kreditin verilməsindən sonra banklar bu cür vəsait qoyuluşunun sərfəli olduğunu anladılar və kredit üzrə daha az faiz dərəcəsi təklif etdilər", - deyə ARDNŞ-də qeyd ediblər.
Bu bir daha göstərir ki, ARDNŞ beynəlxalq maliyyə institutlarının etimadını daha çox qazana bilib.
Hazırda Dövlət Neft Şirkəti "Şahdəniz" layihəsində Fransanın Total şirkəti və Avropa Yenidənqurma və İnkişaf Bankı qarşısındakı borclarının ödənilməsinə yönəldiləcək kreditin alınması üzrə bir sıra banklarla danışıqları davam etdirir. Doqquz Avropa bankından üçü seçilib və bu banklarla danışıqlar aparılır. Verilən kredit sindikatlaşdırılmış olacaq. Krediti almaqla, ARDNŞ Fransanın Total şirkəti və AYİB-ə faizlərin ödənilməsi üzrə müsbət saldo əldə edəcək.
Əvvəllər Azerbaijan (ACG) Limited (AzACG) şirkəti 750 milyon ABŞ dolları məbləğində sindikatlaşdırılmış kredit almışdı. Bu kredit dövlət zəmanəti olmadan verilmişdi. Bu krediti almaqla, ARDNŞ AÇG -nin işlənməsi çərçivəsində kapital qoyma hüququnu alıb. Əvvəllər Exxon Azerbaijan Limited və Turkiye Petrolleri SC ARDNŞ-in "AÇG"yə kapital qoyma hüququnun 10%-ni bərabər hissəyə bölmüş və ARDNŞ əvəzinə özləri layihəyə vəsait qoyub, bunun əvəzində isə neft alıblar. Bütün bu vaxt ərzində şirkətlər 1 milyard 150 milyon ABŞ dolları məbləğində vəsait qoyublar. 750 milyon ABŞ dolları məbləğində krediti alaraq, AzACG Exxon Azerbaijan Limited və Turkiye Petrolleri SC-dən bu hüququ aldı. Vəsaitlərin bir hissəsi artıq hüququn alınmasına yönəldilib, digər hissəsi isə "AÇG" layihəsində birbaşa kapital qoyuluşu üçün istifadə olunacaq. Kredit razılaşmasına görə, əvvəllər Exxon Azerbaijan Limited və Turkiye Petrolleri SC tərəfindən daşınan neft AzACG tərəfindən iki şirkətə - Glencore və Select Energy Trading (SET) şirkətlərinə satılacaq. Bu neftdən gələn mədaxil (cost oil) BNP Paribas-ın (AzACG üçün kreditin təşəbbüsçüsü və zamini qismində çıxış edən) xüsusi hesabına yerləşdiriləcək, buradan isə cash call əsasında AÇG layihəsinə sərmayə qoyulacaq.
Kredit Libor+1,7% şərti ilə verilir. O, dünyada neftin qiymətindən asılı olaraq, 3-5 il ərzində qaytarılacaq. Öz növbəsində, Exxon Azerbaijan Limited və Turkiye Petrolleri SC -nin şərtlərinə görə, onların qoyduğu vəsaitlər 4 % faiz dərəcəsi ilə qaytarılıb. Beləliklə, kreditin alınması ARDNŞ-ə 2,3% həcmində müsbət saldo əldə etməyə imkan verib.
