Azərbaycan Gürcüstana əlavə təbii qazı kommersiya qiymətləri ilə satmaq fikrindədir. Trend xəbər verir ki, bu barədə Azərbaycan Dövlət Neft Şirkətindən bildirilib. "Gürcüstan Azərbaycan qazının qiymətinin Gürcüstana tədarük edilən Rusiya qazının qiyməti ilə eyni olacağını deyərkən vəziyyəti düzgün qiymətləndirir", - deyə ARDNŞ-də qeyd ediblər.
Gürcüstan Bakı-Tbilisi-Ərzurum qaz kəmərindən aldığı qazın kvotasının Türkiyənin hesabına artırılmasına nail olmaq istəyir. Hazırda Gürcüstan tərəfinin "Şahdəniz" qaz-kondensat yatağından əlavə qaz həcmlərinin əldə etməsi məsələsi müzakirə edilir. Əgər Türkiyənin Botaş şirkəti "Şahdəniz" yatağından tədarük edilən qazı qəbul etməyə hazır olmasa, bu baş verə bilər. Lakin Azərbaycanın bu qaza dair öz fikirləri var.
Artıq mövcud sazişə əsasən, Gürcüstan Bakı-Tbilisi-Ərzurum qaz kəmərindən güzəştli şərtlərlə ildə 800 milyon kubmetrə qədər qaz ala bilər, lakin bu həcm artıq Gürcüstana kifayət etmir və o, öz payını ildə 1,5-2 milyard kubmetrə qədər artırmaq niyyətindədir.