Azərbaycan Dövlət Neft Şirkəti (ARDNŞ) ilə Yaponiya Beynəlxalq Əməkdaşlıq Bankı (JBIC) arasında əməkdaşlıq perspektivləri bu gün Bakıda ARDNŞ-in prezidenti Rövnəq Abdullayevin bankın nümayəndə heyəti ilə görüşündə müzakirə olunub. Trend in xəbər verdiyi kimi, bu barədə Dövlət Neft Şirkətinin məlumatında bildirilir.
Sənəddə qeyd edildiyi kimi, bankın baş meneceri Yoşihiro Kumaqaya "JBIC"in Xəzər regionunda iştirak etdiyi layihələr barəsində məlumat verib və bankın ARDNŞ-lə əməkdaşlıq qurmaq niyyətində olduğunu bildirib.
"Yaponiya Beynəlxalq İnkişaf Bankı Qazaxıstan neftinin Azərbaycan ərazisindən keçməklə dünya bazarlarına ixrac üçün mövcud olan nəqliyyat dəhlizinin keçirmə qabiliyyətinin artırılması layihəsində maraqlıdır", - deyə Kumaqaya bildirib.
R. Abdullyaev "JBIC"in təklifini müsbət qiymətləndirərək, Yaponiya şirkətlərinin Azərbaycanda investisiya ilə bağlı niyyətini dəstəkləyib.
ARDNŞ başçısı Dövlət Neft Şirkətinin $750 mln. dəyərində sindikatlaşdırılmış kredit alması və yaxın vaxtlarda sərfəli şərtlərlə "Şahdəniz" layihəsində ölkənin payını maliyyələşdirmək üçün yeni kredit sazişinin imlanması barədə məlumat verib.
