"Şahdəniz" layihəsinin "Mərhələ-1" çərçivəsində 185 mlrd. kubmetr təbii qaz və 300 mln. barel kondensatın hasil edilməsinə icazə verilib. "Mərhələ -1" çərçivəsində ən yüksək hasilat ildə 8,7 mlrd. kubmetr qaz təşkil edəcək. Layihəyə kapital xərclər 4 mlrd. ABŞ dolları təşkil edir. Bu barədə Trend bu layihələrin texniki operatoru olan BP-nin rəsmi saytında yerləşdirilmiş təqdimata istinadən xəbər verir.
Bu gün şirkət problemləri həll etdikdən sonra yataqda qaz hasilatını bərpa edib. BP əvvəllər problemlərin müşahidə edildiyi ilk qabaqlayıcı quyuya məhlulun tökülməsini başa çatdırıb. "Şahdəniz" yatağında texniki səbəblərdən hasilatın dayandırıldığı ilk qabaqlıyıcı quyuda 800-900 metr dərinliyində qaz sızması aşkar edilib.
Bu il fevral ayının ortasında şirkət ikinci qabaqlayıcı quyunu işə salmaq niyyətindədir. Hazırda onun qoşulması və hasilatın başlanması üzrə işlər davam etdirilir. Quyu sutkada 3,4 mln. kubmetr qaz və 1300 ton kondensat verir.
2007-ci ildə "Şahdəniz"dən 5,4-5,6 mlrd. kubmetr qaz hasil ediləcək.
