Azərbaycan,Bakı/müxbir Trend İ.Xəlilova/ Azərbaycanın İqtisadi İnkişaf Nazirliyi beynəlxalq sazişlərə əsaslanaraq Barmek şirkətinə qarşı məhkəmə iddiasına baxılması üçün vəsatətlə çıxış edib. Bu barədə şənbə günü iqtisadi inkişaf nazirinin müavini Mikail Cabbarov məlumat verib.
İddia Bakı və Sumqayıt elektrik şəbəkələrinin Barmekin idarəsinə verilməsi üzrə müqaviləyə əsasən verilib. Barmek-in iddiasında ziyanın ödənilməsi üçün elektrik şəbəkələrində çatışmayan aktivlərin qiymətləndirilməsi nəticələrinə əsasən müəyyən olunmuş 30 mln. manat tələb olunur.
Məhkəmə iddiasına baxılma müddətinin təyin olunmasına baxmayaraq, şirkətin qərəzli hərəkətləri səbəbindən iş üzrə dinləmə yubanır, deyə nazir müavini bildirib.
"Bu, açıq proses olacaq və iclasın bu yaxınlarda keçirilməsinə ümid edirik", deyə M.Cabbarov qeyd edib.
İqtisadi İnkişaf Nazirliyi hazırki mərhələdə 30 mln. manatın ödənilməsini tələb edir, lakin Barmek-in aldığı elektrik enerjisinə görə "Azərenerji" SC-yə borcu da var.
"Bu borc üzrə məsələ vəziyyətin inkişafından asılı olaraq həll olunacaq", deyə o bildirib.
Barmek-in "Azərenerji" qarşısında iki cür borcu var: ümumilikdə ödənmənin həyata keçirilmədiyi 2006-cı ildə əldə olunmuş elektrik enerjisi və şirkətin 2008-ci ildən başlayaraq ödəməli olduğu güzəştli qiymətlə təqdim olunan elektrik enerjisinə görə borc.
Müqaviləyə əsasən, Barmek Azerbaycan ardıcıl olaraq elektrik enerjisinin ödənilmə səviyyəsini 50%, 55%, 60%, 75% (2005 -ci ildən) və 2006-cı ildən dəyərin 100%-ə qədər artırmalı idi. Ümumilikdə şirkətin borc həcmi bir neçə yüz milyon dollar məbləğində hesablanır.
