Azərbaycan, Bakı / müxbir Trend S.Babayeva/ "Surakhani Oil" əməliyyat şirkətində həmkarlar komitəsi yaradılıb. Bu barədə bazar ertəsi Neft və Qaz Sənayesi İşçilərinin Respublika Həmkarlar Komitəsinin rəhbəri Cahangir Əliyev məlumat verib.
"Surakhani Oil" "Suraxanı" neft-qaz quru yatağının işlənməsi ilə məşğul olur. Əliyevin sözlərinə görə, Respublika Komitəsi Azərbaycanın neft şirkətlərində həmkarlar komitələrinin sayının artırılması ilə əlaqədar fəal iş aparır.
Təşkilat sədri bildirib ki, bu komitə "McDermott" və "Bosshelf" şirkətləri neftçilərinin tətilindən sonra yaradılmış sayca onuncu komitədir. Bu gün həmkarlar komitələri əsasən "McDermott", "Bosshelf", "PCH Offshore", "Shirvan Oil", "Salyan Oil", "Azgerneft", "Anshad Petrol", "Lukoil Azerbaijan" və b. şirkətlərdə fəaliyyət göstərir.
Əliyev bildirib ki, ilin sonuna qədər daha iki şirkətdə analoji komitələr yaradılacaq.
"Suraxanı" quru yatağının işlənməsi üzrə müqavilə 16 avqust 2005-ci il tarixdə imzalanıb. Layihənin iştirakçıları: "Rafi Oil" - 70% və ADNŞ - 25%.
"Suraxanı" yatağı sutkada 35 ton net debiti olan fontan quyusu ilə 1904-cü ildə açılıb. Açılışdan bu günə qədər yataqdan 114,5 mln. ton neft və 10 mlrd. kubmterdən çox qaz hasil olunub.
Yatağın çıxarılan qalıq ehtiyatları 6,8 mln. ton neft təşkil edir. Potensial çıxarılan ehtiyatlar 94 faiz təşkil edir.
