Azərbaycan, Bakı, / Trend müxbir S.Babayeva/ Trans-Asiya-Avropa (TAA) fibrooptik kabel magistralının Xəzər siqmentinin tikintisində maraqlı olan ölkələrin rabitə administrasiyaları rəhbərlərinin bu həftəyə planlaşdırılan görüşü Qazaxıstan və Türkiyə tərəfinin gərgin iş qrafiki səbəbindən təxirə salınacaq. Bu barədə cümə axşamı Azərbaycanın Rabitə və İnformasiya Texnologiyaları Nazirliyinin (RİTN) beynəlxalq əlaqələr və hesablamalar mərkəzinin rəhbəri Cəlil Cəfərov bildirib.
TAA Siyəzən (Azərbaycan) - Aktau (Qazaxıstan) marşrutu üzrə çəkiləcək.
Onun sözlərinə görə, Bakıda baş tutacaq görüşün ilin sonuna qədər keçiriləcəyi istisna olunmur. Burada hərtərəfli plan qəbul olunacaq və protokol imzalanacaq.
Noyabrda Azərbaycan tenderin keçirilməsi və layihə çərçivəsində texniki iqtisadi əsaslandırmanın hazırlanması təklifi ilə çıxış edib. 1999-cu ildə aparılan qiymətləndirməyə görə, dənizin dibi ilə kabel tikintisinin dəyəri 10 mln. dollr təşkil edir. Layihə dəyərinin artacağı istisna olunmur. Yekun qiymət tender keçirildikdən sonra müəyyən olunacaq.
Azərbaycan və Qazaxıstan operatorları - Azərbaycan RİTN-nin beynəlxalq əlaqələr və hesablamalar mərkəzi və Qazaxıstanın "KazTransSom" şirkəti arasında protokol imzalanıb. Bu sənədə müvafiq olaraq, xərclərin 50 faizi Azərbaycan, 50 faizi isə Qazaxıstan tərəfindən ödəniləcək.
Qaxzaxıstan və Azərbaycan arasında mövcud olacaq marşrutun ölçüsü 380 km təşkil edəcək. Hazırda mövcud olan marşrut Azərbaycan ərazisini dövr edərək Türkmənistan və İrandan keçir.
Azərbaycan RİTN-də hesab edirlər ki, TAA kabelinin Azərbaycandan çəkilməsi layihəsinin reallaşdırılması marşrutun demək olar ki, 2000 km azalmasına gətirib çıxaracaq ki, bu da informasiya ötürülməsini sürətləndirəcək.