Azərbaycan, Bakı/ Trend , müxbir S.Babayeva/ Azərbaycan Rabitə və İnformasiya Texnologiyaları Nazirliyinin Aztelekom İstehsalat Birliyi (İB) 2007-ci ildə 20 mln. manatlıq investisiya layihələri reallaşdırıb. Bu barədə cümə axşamı Rabitə Nazirliyindən məlumat veriblər. İnvestisiya layihələri sırasında Şamaxıda və kənd yerlərində NGN (Next Generation Network) pilot şəbəkəsinin yaradılması layihəsi də var. Elektron Azərbaycan layihəsinin mikromodeli olan Elektron Şamaxı layihəsinin reallaşdırılması nəticəsində, Şamaxı rayon telefon şəbəkəsinin NGN bazasında yenidən quruluması təmin edilib. Rayon və kənd yerlərində informasiya texnologiyalarının tətbiqi üçün lazımi infrastruktur yaradılıb. Şamaxı rayonunda ənənəvi xidmətlərlə yanaşı, İP TV, İP telefoniya, "Triple play", digər multimedia xidmətləri və informasiya texnologiyalarını dəstəkləyən xidmətlər də göstəriləcək. Dəyəri 2.9 mln. manat olan investisiya layihələri nəticəsində, telefon şəbəkəsinin ümumi həcmi 50% artırılıb və 11.5 min nömrəyə çatdırılıb. Şəbəkə özü tamamilə elektronlaşdırılıb. Nəticədə, "Aztelekom" üzrə tam elektronlaşdırılmış telekommunikasiya xətlərinin sayı 21-ə çatıb. Digər investisiya layihəsi İmişli ATS-nin tam yenidənqurulması layihəsidir. İmişli telekommunikasiya xəttinin telefon şəbəkəsinə ümumi həcmi 4456 nömrə (4200 nömrə ATSK-100/200, 256 nömrə KAREL DS-200) olan iki şəhər ATS-i, 1000 nömrəlik CDMA tipli yeni naqilsiz telefon şəbəkəsi, bir 300 nömrəlik şəhər tipli qəsəbə ATS-i, həmçinin, 1000 nömrəlik 16 kənd ATS daxildir. Yeni EATS-in istismara verilməsilə mərkəzi rayon ATS-i tam elektronlaşdırılıb. Nömrə həcmi 23.5% (1048 nömrə) artırılaraq 5504 nömrəyə çatıdırılıb. Şəbəkəyə 1184 həcmli kanal daxil edilib. Ümumilikdə 2007-ci il ərzində 62 nömrə, 442 km fibrooptik magistral və birləşdirici xətlər, 14 km KSPP kabel xətləri, 30 minədək abonent xətləri istifadəyə verilib. ATS-in montaj həcmi 30 min nömrə artırılıb və 644 min nömrəyə çatdırılıb. Regionlarda telefon şəbəkələrinin elektronlaşdırılmasının səviyyəsi 70%-i ötüb.
...
