Azərbaycan, Bakı, 14 aprel / Trend , müxbir S.Babayeva/ Azərbaycan və Qazaxıstan "Axiom" Konsaltinq Şirkətini Trans-Asiya-Avropa fibrooptik kabel magistralının Xəzər siqmentinin tikinti layihəsi üzrə məsləhətçisi seçib. Bu barədə Azərbaycan Rabitə və İnformasiya Texnologiyaları Nazirliyi beynəlxalq əlaqələr və hesablamalar Mərkəzinin direktoru Cəlil Cəfərov məlumat verib.
Şirkət tərəflərə biznes-planı üzrə hesablamalar, layihənin gəlir səviyyəsini, magistralın tikinti şərtlərini təqdim etməlidir. Şirkətin tərəflərə təqdim edəcəyi hesabatın dəqiq vaxtını Cəfərov bildirməyib.
TAA-nın planlaşdırılmış marşrutu Siyəzən(Azərbaycan) - Aktau(Qazaxıstan) marşrutu olacaq.
Dənizin dibi ilə çəkilən rabitə kabelinin tikinti dəyəri 1999-cu ildə aparılmış qiymətləndirmələrə əsasən 10 mln. dollardır. Azərbaycan və Qazaxıstan layihə qiymətlərini paritet əsaslarla ödəyəcək.
Qazaxıstan və Azərbaycan arasında marşrutun uzunluğu 380 km olacaq. Hazırda fəaliyyət göstərən marşrut Türkmənistan və İrandan keçərək, Azərbaycan ərazisini dolanır.
Azərbaycanın Rabitə Nazirliyindən hesab edirlər ki, TAA kabelinin Azərbaycan ərazisindən çəkilməsi üzrə layihənin gerçəkləşdirlməsi marşrutun təxminən 2000 km qısalmasına gətirib çıxaracaq.Bu da informasiya ötürülməsi trafikini sürətləndirəcək.
Mərkəz rəhbərinin məlumatına görə, Türkmənistanla danışıqlar aparılır, belə ki, bu ölkə ilə razılaşma əldə olunsa, kabel marşrutunu əhəmiyyətli şəkildə qısaldaraq, Qırğızıstan və Çin ilə əlaqəni həyata keçirmək olar. Bunun üçün hazır layihə mövcuddur.