Azərbaycan, Bakı, 30 aprel / Trend , müxbir S.Babayeva/ Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi (İB) Azərbaycan ərazisində NGN (Next Generation Network) şəbəkəsinin yaradılması üçün elan olunmuş tenderin vaxtını uzadıb. İB məlumat verir ki, Şəmkirdə NGN xidmətləri göstərmək üçün tender prosedurlarında yalnız bir şirkət iştirak etməsi səbəbindən tender təkliflərinin açılması mayın 23-nə nəzərdə tutulub.
Əvvəllər İB Göyçay və Salyan rayonlarında analoji tenderlərin tarixini təxirə salıb, birinci rayonda təkliflərin tender prosedurları mayın 20-də, ikincidə isə mayın14-də keçiriləcək.
Ötən il analoji şəbəkə Şamaxıda və rayonun 23 kəndində quraşdırılaraq istifadəyə verilib. Onun tətbiqindən sonra bütün region sakinləri İP telefoniya, İnternet, televiziya və xidmətlər-bazası xidmətlərindən istifadə etmək imkanı əldə ediblər. Bunun üçün Şamaxının bütün kənd ATS-ləri və mərkəzi ATS-lərində Sloveniyanın "Iskratel" şirkətinin lazım olan avadanlıqları quraşdırılıb.
NGN (Gələcək nəsil şəbəkəsi) nitq, təsvir və kommutasiya paketlərindən istifadə ilə məlumatların ötürülməsi üçün təyin edilmiş çoxməqsədli şəbəkədən ibarətdir. NGN şəbəkəsi telekommunikasiya trafikləri üzrə müxtəlif növlər üçün lazımi xidmət keyfiyyətini təmin edir. Yuxarıda göstərilən texnologiyaların tətbiqi abunəçilərə VoIP-telefoniya, səsli poçt, məlumat ötürmə xidməti, multimediya xidmətləri, virtual xüsusi şəbəkə, məlumatların unifikasiya edilmiş mübadiləsi, məlumatların ani mübadiləsi, interaktiv nitq cavabı sistemi üzrə xidmət, interaktiv oyunlar, video konfrans və ev meneceri kimi xidmətlərdən istifadə etmək imkanı verəcək.