Azərbaycan, Bakı, 22 oktyabr/ Trend , müxbir S.Babayeva/ "Azərbaycanın Rabitə və İnformasiya Texnologiyaları Nazirliyi gələn il ölkədə genişxətli İnternet istifadəçilərinin sayının xeyli artacağını gözləyir", - rabitə və informasiya texnologiyaları nazirinin müavini İltimas Məmmədov çərşənbə günü bildirib.
"Bu gün onların sayı bir neçə on min olsa da, gələcəkdə bu rəqəmin artacağı gözlənilir. Bundan əlavə, 2009-cu ildə Azərbaycanda WIMAX xidmətinin fəal tətbiqi gözlənilir", - Məmmədov bildirib.
Nazir müavininin sözlərinə görə, 2009 - cu illdə İnternet xidmətlərinin qiymətlərində dəyişikliklərlə yanaşı, təklif edilən xidmətlərin keyfiyyətləri də yaxşılaşacaq. O, konkret plan və layihələri açıqlamayıb.
Rabitə Nazirliyi ölkədə İnternetin populyarlaşdırılması və çıxış qiymətlərinin azaldılması məqsədilə Tarif Şurasına İnternet-resursların qiymətlərinə yenidən baxılması üzrə təkliflər təqdim edib.
İdarədən qeyd edirlər ki, ilin əvvəlindən ölkədə İnternetə çıxış qiymətləri 35 - 40 faiz azalıb.
Rabitə Nazirliyinin məlumatlarına əsasən, ölkədə İnternet istifadəçilərinin sayı 1 mln. nəfərdir.
Müəlliflə əlaqə saxlamaq üçün elektron ünvan: [email protected]
