Azərbaycan, Bakı, 27 noyabr/ Trend , müxbir S.Babayeva/ 2008 - ci ilin üçüncü rübü ərzində fiziki şəxslərin pul köçürmələri sistemləri və poçt vasitəsilə Rusiyadan MDB ölkələrinə həyata keçirilmiş transsərhəd köçürmələri 4 mlrd. 699 mln. dollar təşkil edib. Bununla yanaşı, bu ölkələrdən RF-yə cəmi 554 mln. dollar köçürülüb.
Rusiya Mərkəzi Bankının məlumatına əsasən, bu dövr ərzində fiziki şəxslərin Azərbaycana köçürmələrinin həcmi 334 mln. dollar təşkil edib, bir köçürmənin orta məbləği 977 dollar civarında olub. Azərbaycandan RF-yə 17 mln. dollar daxil olub, bir əməliyyatın orta məbləği 1071 dollar təşkil edib.
"Rəsmi məlumatlara əsasən, Rusiya Federasiyasında 2 mln, qeyri-rəsmi məlumatlara görə isə - 3 milyonadək azərbaycanlı yaşayır).
Fiziki şəxslər tərəfindən Rusiyadan Ermənistana 456 mln. dollar köçürülüb, bir köçürmənin orta məbləği 1078 dollar təşkil edib; Gürcüstana - bir əməliyyatın orta məbləği 718 dollar olmaqla, 225 mln. dollar, Ermənistandan Rusiyaya köçürmələrin məbləği 31 mln. dollar, Gürcüstandan - 21 mln. dollar təşkil edib.
MDB ölkələri arasında Rusiyaya daxilolmaların məbləğinə görə ən böyük pay Qazaxıstanın payına düşüb - 156 mln. dollar. MDB məkanında RF-dən ən böyük daxilolma həcmi Özbəkistanın payına düşüb - 1170 mln. dollar.
