Azərbaycan, Bakı, 10 avqust / Trend , müxbir H.Vəliyev /
3G standartında rabitə xidməti göstərilməsinə lisenziyalar onların verilməsi prosedurunun tədqiqindən sonra ayrılacaq. Bu barədə bazar ertəsi Trend -a rabitə və informasiya texnologiyaları nazirinin müavini Elmir Vəlizadə deyib.
Vəlizadənin qeyd etdiyi kimi, nazirlik yaxın zamanlarda bu məsələnin nəzərdən keçirilməsinə başlamağı planlaşdırır. Bundan sonra mobil rabitə operatorlarına onların verilməsinin konkret müddətindən danışmaq olar.
Xüsusi razılıq (lisenziya) tələb edən fəaliyyət növlərinin siyahısına 3G standartı üzrə rabitə xidmətlərinin göstərilməsinə lisenziya verilməsini nəzərdə tutan maddənin daxil edilməsi barədə fərmanı Azərbaycan Prezidenti İlham Əliyev ötən həftə imzalayıb. Fərmana əsasən, Nazirlər Kabinetinə bir ay müddətində xüsusi razılıq (lisenziya) verilməsi üçün tələb olunan əlavə şərtlərin müəyyənləşdirilməsi tapşırılıb. Lisenziyanın hökumət tərəöfindən müəyyənləşdirilmiş rəsmi məbləği 11 000 manatdır.
"Azerfon" şirkətinin baş direktoru Gido Helbixin sözlərinə görə, hazırda Azərbaycanda biznes yeni nəsil rabitə standartına keçidə hazırdır. Bazarda innovasiya xidmətlərinə, xüsusən də məlumatların ötürülməsi xidmətlərinə yüksək tələbat nəzərə çarpır. Helbixin sözlərinə görə, daha perspektivli mobil İnternetdir.
Öz növbəsində "Azercell" rəhbərliyi də 3G tətbiqinə texniki cəhətdən hazırlıqlarını bildirib. "Azercell Telecom"-un baş direktoru Əli Ağanın sözlərinə görə, şirkət yalnız lazımlı tezlik resurslarının ayrılmasını gözləyir, qalan məsələlər zamanın işidir. Ağanın sözlərinə görə, şirkətə 3G şəbəkəsini kommersiya istismarına vermək üçün bir neçə həftə lazımdır.
Baza stansiyalarının yenidən texniki təchizatı 3G, WiMAX və LTE kimi mobil radio-texnologiyalarla asan birləşə bilən Flexi EDGE baza stansiyası üçün platformaya üstünlük verən "Bakcell" şirkəti tərəfindən də həyata keçirilir. "Bakcell"-in baş direktoru İneke Botterin sözlərinə görə, Bakcell tərəfindən tətbiq edilən yeni texnologiyalar şirkətə abonentlərə ADSL-lə müqayisə oluna bilən, səsli xidmətlərlə məlumatların sürətli ötürülməsini birləşdirən yeni mobil xidmətlərin göstərilməsində çevikliyi təmin etməyə imkan verir.
3G-nin işə salınması üçün lisenziyanın verilməsi əlavə investisiyaların cəlb olunmasına, Azərbaycanda telekommunikasiya şəbəkələrinin inkişafına və modernləşdirilməsinə kömək edəcək.
Məqalə müəllifi ilə əlaqə ünvanı: [email protected]