Azərbaycan, Bakı, 19 avqust / Trend , müxbir H.Vəliyev /
Rabitə və İnformasiya Texnologiyaları Nazirliyi (RİTN) mobil rabitə operatorlarına üçüncü nəsil rabitənin (3G) tətbiqi üzrə lisenziyaların sentyabrın ikinci yarısında verilməsini planlaşdırır. Bu barədə RİTN-dən məlumat verilib.
Lisenziyanın hökumət tərəfindən tətbiqinin rəsmi dəyəri 11 min manatdır. Sözügedən texnologiyanın tətbiqi üçün tezlik resursu Dövlət Radiotezliklər İdarəsi tərəfindən ayrılacaq. Verilmənin şərtlərinə əsasən, GSM operatorlarının texniki təchizatı milli standardlara uyğun olmalıdır ki, bu da lisenziyanın alınması üçün vacib meyarlardan biridir.
RİTN-in şərtlərinə əsasən, operatorların şəbəkələri lisenziyanın verilməsinə qədər 3G-nin işə salınmasına hazır olmalıdır.
Milli operatorlar hələ 2006-cı ildə yeni nəsil şəbəkənin tətbiqinə hazır olduqlarını bildirmişdilər. Lakin hər şey dövlət tərəfindən nə zaman gərəkli radiotezlik resurslarının ayrılacağı və lisenziyanın veriləcəyindən asılı idi. Hər üç operator daxili korporativ səviyyədə 3G texnologiyasının imkanlarını uğurla sınaqdan keçiriblər.
3G-nin ilkin imkanları BakuTel-2008 telekommunikasiya sərgisi çərçivəsində nümayiş etdirilib. Hazırda mobil rabitə şəbəkəsində məlumatların ötürülməsi xidməti Data-kart (məlumatların ötürülmə sürəti 384 Кbit/s-yə çatır) və EDGE texnologiyası (236 Kbit/s-dək) vasitəsilə həyata keçirilir. 3G-nin istifadəyə verilməsi şəbəkələrin buraxılış qabiliyyətini əhəmiyyətli dərəcədə artıracaq. Bu da qeyri-ənənəvi rabitə xidmətlərinin (mobil TV, videotelefon, İnternet şəbəkəsinə giriş, həcmli kontentlərin göndərilməsi və qəbulu və s.) tətbiqi üçün imkanlar yaradacaq.
Hazırda operatorlar kifayət qədər böyük abonent bazasına, hazır şəbəkələrə və şəbəkə infrastrukturlarına malikdirlər, eləcə də lisenziyaya sahib olmaq üçün qoyulan tələblərə tam cavab verirlər.
Məqalə müəllifi ilə əlaqə ünvanı: [email protected]
