Azərbaycan, Bakı, 24 sentyabr / Trend , müxbir H.Vəliyev /
2011-ci ildə Azərbaycanın bütün vətəndaşları elektron pasport alacaqlar. Pasport özündə sahibi barədə biometrik məlumat əks etdirəcək. Bu barədə jurnalistlərə müsahibəsində İnformasiya Texnologiyaları İnstitutunun direktoru Rasim Əliquliyev bildirib.
Bu, Azərbaycan Respublikasının Prezidenti İlham Əliyevin 2007-ci ilin fevral ayının 12-də verdiyi "Azərbaycan Respublikasında biometrik identifikasiya sisteminin yaradılması üzrə dövlət proqramının hazırlanması və dövlət komissiyasının yaradılması barədə" fərmanı ilə nəzərdə tutulub.
Əliquliyevin sözlərinə əsasən, hazırda sözügedən istiqamətdə lazımı tədbirlərin həyata keçirilməsi məqsədilə qanunvericilik bazasının yaradılması üzrə işlər aparılır. "Azərbaycan vətəndaşlarının dövlət qeydiyyat sistemi haqqında" qanun layihəsi işlənmə mərhələsindədir. Qanun layihəsi ölkə vətəndaşları haqqında məlumatın daxil olduğu elektron məlumat bazasının yaradılmasını nəzərdə tutur. Qanuna əsasən, hər bir vətəndaşa xüsusi identifikasiya nömrəsinin verilməsi nəzərdə tutulur.
Biometrik məlumatın qeyd olunduğu pasportlar beynəlxalq mülki aeronaviqasiyanın təhlükəsizliyinin təmin olunması, şəxsiyyəti təsdiq edən sənədlərin saxtalaşdırılmadan müdafiə səviyyəsinin artırılması, dövlət sərhədlərini keçərkən vətəndaşın şəxsiyyətinin dəqiq və operativ identifikasiyası mexanizmlərinin təkmilləşdirilməsi, beynəlxalq aviadaşımanın səviyyəsinin və səmərəliliyinin artırılması məqsədilə verilir.
Azərbaycan Prezidentinin fərmanı ilə vətəndaşların hazrkı pasportlarının biometrik pasportlar ilə əvəzləməsi üsulu təsdiqlənib. Dövlət proqramı iki mərhələyə ayrılıb. Birinci mərhələ (2007-2009) bu sistemin formalaşdırılması üçün normativ-hüquqi bazanın yaradılmasını nəzərdə tutur. 2010-2012-ci illər üçün nəzərdə tutulmuş ikinci mərhələ çərçivəsində biometrik pasportizasiya infrastrukturunun yaradılması və biometrik texnologiyaların daha geniş istifadəsi nəzərdə tutulur.
Sərəncamın icrası üçün müvafiq nazirliklərin iştirakı ilə Baş nazirin başçılığı altında Dövlət Komissiyası yaradılıb.
İndiyə kimi müasir informasiya texnologiyalarının istifadəsi ilə hazırlanan biometrik parametrli pasportlar dünyanın 100-dən çox ölkəsində tətbiq edilir.
Əliquliyevin sözlərinə əsasən, yeni tipli pasportlarda beynəlxalq standartlara müvafiq olaraq barmaq izləri və şəxsin üz quruluşu barədə biometrik məlumatlar yerləşdiriləcək.
Məqalə müəllifi ilə əlaqə ünvanı: [email protected]
