Azərbaycan, Bakı, 03 mart / Trend , müxbir H.Vəliyev/
Azərbaycan Milli Elmlər Akademiyasının (AMEA) İnformasiya Texnologiyaları İnstitutu (İTİ) ElmNet vahid akademik şəbəkədə Akademiyanın birləşmiş strukturu üçün fəaliyyət göstərəcək İnternet Mərkəzinin şəbəkə infrastrukturunun qurulması üzrə işlər aparır. Bu barədə İTİ-nin söbə müdiri Əmiraslan Əliyev Trend -a bildirib.
Əliyevin sözlərinə görə, hazırda institutun əməkdaşları rabitə xətlərinin çəkilməsi üzrə işlər aparır. Mərkəzin binasında altı yüksəksəmərəli server və telekommunikasiya avadanlığı quraşdırılıb.
ElmNet şəbəkəsində verilənlərin ötürülmə sürəti ilkin olaraq 48 Mbit/s təşkil edəcək. Verilənlərin ötürülmə sürətinin gələcəkdə 100 Mbit/s-ə çatdırılması planlaşdırılır. İnternet kanalı Delta Telecom şirkəti tərəfindən təqdim olunub.
Bu gün akademik şəbəkə üç istiqamətə - Geologiya İnstitutu, Fizika İnstitutu və Kibernetika İnstitutu istiqamətinə çəkilib. Seqmentlərdən hər biri Elmlər Akademiyasının yaxın ərazidə yerləşən digər strukturları ilə əlaqələnir. Bu gün akademik şəbəkədə fəaliyyət göstərən kompüterlərin sayı 1400 ədədə çatır.
Şəbəkə xarici elm-təhsil şəbəkələri ilə informasiya mübadiləsinin təşkil edilməsini, informasiya resurslarını toplamağı və Elmlər Akademiyasının şöbələri arasında informasiya dəstəyini nəzərdə tutur.
Layihənin əsasında üç əsas məqsəd dayanır. Bu məqsədlər araşdırmalar və akademik şəbəkələr üçün əlçatan olan beynəlxalq əlaqələrin yaradılmasına yardım, şəbəkə infrastrukturlarının artımına imkanlar yaratmaq və informasiya mübadiləsi, həmçinin şəbəkə ilə iş üçün kadrlar hazırlamaqdan ibarətdir.