Azərbaycan, Bakı, 17 aprel /Trend, müxbir H.Vəliyev/
Malayziya qanunvericiliyinə görə, ilk Azərbaycan peykinin istehsalçısı ilə və orbital mövqenin icarəsi haqqında müqavilənin imzalanması neytral ölkədə həyata keçirilməlidir. Bunu şənbə günü rabitə və informasiya texnologiyaları naziri Əli Abbasov deyib.
"Bu gün Azərbaycan üçün ən mühüm məsələ Malayziya tərəfindən təqdim olunacaq orbital mövqenin icarəsidir. Azərbaycan peykin tezlik mənimsəmələrinin və orbital mövqeyinini digər ölkələrlə tam koordinasiyası üzrə işləri həyata keçirməyənə qədər, bu ölkənin orbital mövqeyindən milli peykin ehtiyacları üçün istifadə olunacaq.
Xəbər verildiyi kimi, Malayziya peyk resurslarının 40 faizini almağa hazır olduğunu bildirib. Ümumilikdə, nazirlik beynəlxalq bazara "Azerspace"in resurslarının 80 faizini çıxarmaq, qalan 20 faizindən isə respublikadaxili səviyyədə istifadə etmək niyyətindədir.
Nazirin sözlərinə görə, bu gün Malayziya hökuməti müqavilənin imzalanması müddətinin bu ayın sonunadək uzadılması xahişi ilə müraciət edib. Bu məsələ istehsalçı şirkətlə razılaşdırılıb. Əgər bu, 2012-ci ilin iyununa təyin olunan ilk milli peykin buraxılmasının vaxtına təsir göstərməsə, Azərbaycan tərəfi tərəflərin şərtlərini qəbul etməyə hazırdır.
Xəbər verildiyi kimi, "Azerspace" peykinin tezlik mənimsəmələrinin və orbital mövqenin koordinasiyası üzrə məsələlər Qazaxıstan və Ukrayna tərəfləri ilə müzakirə olunub.
"Azerspace" milli peykinin yerləşdirilməsi üçün ITU (International Telecommunication Union) tərəfindən 43.2, 58.5 və 96 dərəcə şərqi uzunluqda mövqelər ayrılıb. İTU peykləri yuxarıda sadalanan mövqelərdə yerləşəcək ölkələrin siyahısını Azərbaycana təqdim edib. Ən çox prioritet 43.2 və 58.5 dərəcə şərqi uzunluqda mövqelər üzrə məsələnin razılaşdırılmasıdır. Koordinasiyada əsas məqsəd gələcəkdə abonentlərdə problemlərin yaranmaması üçün məsələlərin vaxtında həll olunmasıdır.
