Azərbaycan, Bakı, 19 may /Trend, müxbir H.Vəliyev/
Regional Rabitə Birliyinə (RRB) üzv olan ölkələr radiotezlik göstəricisi və peyk orbitindən istifadənin idaretmə prinsiplərini beynəlxalq səviyyədə müzakirə edəcəklər. Bu barədə RRB-nin məlumatında deyilir.
Məsələ RRB-yə üzv ölkələrin "Radiotezlik göstəricisi və peyk orbitindən istifadənin idaretmə prinsiplərinin beynəlxalq səviyyədə müzakirəsi" mövzusunda Daşkənddə iyunun 21-dən 25-dək keçiriləcək beynəlxalq seminarı və ITU-un (International Telecommunication Union) praktikumu çərçivəsində müzakirə olunacaq.
"Seminarın işində Azərbaycanı Rabitə və İnformasiya Texnologiyaları Nazirliyinin Dövlət Radiotezlik İdarəsi təmsil edəcək", - bu barədə Trend-ə idarədən bildiriblər.
Seminar Regional Rabitə Birliyinin dəstəyi ilə Radiorabitə və IT elektrik rabitənin inkişafı bürosu tərəfindən təşkil olunacaq.
Seminarın keçirilməsində əsas məqsəd təcrübə mübadiləsi, spektrin beynəlxalq səviyyədə nizama salınması üzrə informasiya alınması, radiotezlik göstəricisindən və peyk orbitlərindən istifadənin effektivliyini artırmaqdır.
Seminarda əsas tənzimləyici sənədlər, radiotezlik göstəriciləri və peyk orbitindən istifadənin idaretmə prinsiplərinin nizama salınması metodları, həmçinin şüalanmaya beynəlxalq nəzarət məsələləri, RRB ölkələrində GE 06 rəqəmsal radioötürücüləri planının həyata keçirilməsi və digər məsələlərin müzakirə olunması təklif edilir.
