Azərbaycan, Bakı, 18 avqust /Trend, müxbir Q.Vəliyev/
Azərbaycan Rabitə və İnformasiya Texnologiyaları Nazirliyi "2010-2012-ci illərdə Azərbaycanda rabitə və informasiya texnologiyalarının inkişafı üzrə Dövlət Proqramının (Elektron Azərbaycan)" həyata keçirilməsi üzrə koordinasiya şurasının yaradılması məsələsini nəzərdən keçirməyə başlayır. Bu barədə çərşənbə günü Azərbaycan Rabitə və İnformasiya Texnologiyaları Nazirliyinin mətbuat xidmətinin rəhbəri Müşfiq Əmirov deyib.
Əmirovun sözlərinə görə, Koordinasiya Şurasının yaradılması ilə əlaqədar, bu gün Azərbaycan Rabitə və İnformasiya Texnologiyaları Nazirliyində müvafiq dövlət qurumları nümayəndələrinin iştirakı ilə iclas keçiriləcək.
Bugünkü iclasın əsas mövzusu Koordinasiya Şurasının yaradılma aspektlərinin müzakirəsi, onun tərkibinin və dövlət layihəsi çərçivəsində qarşıya qoyulan vəzifələrin yerinə yetirilməsi üzrə gələcək strategiyanın müəyyənləşdirilməsi olacaq. Şuranın fəaliyyəti müvafiq istiqamətlər üzrə Dövlət Proqramı çərçivəsində qarşıya qoyulan vəzifələrin yerinə yetirilməsi ilə bağlı işlərin koordinasiyası və iş planının hazırlanması olacaq.
Rabitə və İnformasiya Texnologiyaları Nazirliyi yanında fəaliyyət göstərəcək Koordinasiya Şurasının tərkibinə müvafiq dövlət qurumlarının nümayəndələri daxil olacaq.
Azərbaycan Prezidenti İlham Əliyevin təsdiqlədiyi Dövlət Proqramının əsas məqsədləri "Azərbaycan Respublikasının İnkişafı Naminə İnformasiya və Kommunikasiya Texnologiyaları Üzrə Milli Strategiya (2003 - 2012-ci illər)"da qoyulan vəzifələrin yerinə yetirilməsidir.
Dövlət Proqramı dörd əsas istiqamət üzrə reallaşdırılacaq. Bunlar telekommunikasiya və poçt infrastrukturunun və xidmətlərinin inkişafı, dövlət və yerli idarəetmə orqanlarında informasiya-kommunikasiya texnologiyalarının tətbiqi və elektron xidmətlərin inkişafı, informasiya cəmiyyətinə keçid üçün şəraitin yaradılması, eləcə də İKT ixrac və rəqabətə davamlılığın gücləndirilməsidir.
Proqramın maliyyələşdirilməsi dövlət büdcəsi, daxili və xarici investisiyalar, kreditlər, qrantlar, beynəlxalq və xarici təşkilatların texniki-maliyyə yardımı, həmçinin, qanunvericiliyə zidd olmayan digər mənbələr hesabına həyata keçiriləcək.
Dövlət Proqramının reallaşdırılması ilə informasiya cəmiyyətinin, İnternet seqmentinin inkişafı üçün şəraitin yaradılması, kompüter istifadəçiləri dairəsinin genişlənməsi, "rəqəm bərabərsizliyi"nin aradan qaldırılması, "elektron hökumət" həllinin tətbiqi, elektron rəqəmli imzaların və digərlərinin tətbiqi gözlənilir.
"Elektron Azərbaycan" proqramının növbəti mərhələsi çərçivəsində tədbirlər planına uyğun olaraq, operatorların infrastruktur şəbəkəsinin inkişafı, şəbəkələrin tamamilə elektronlaşdırılmasını, telekommunikasiya sahəsində müstəqil nizamlayıcı orqanın yaradılmasını, peyk rabitəsi əsasında xidmətlərin göstərilməsini, elektron kommersiyanın inkişafı üzrə tədbirləri nəzərdə tutur.
Azərbaycan Prezidentinin sərəncamı ilə Rabitə və İnformasiya Texnologiyaları Nazirliyinə Dövlət Proqramının yerinə yetirilməsinin əlaqələndirilməsi tapşırılıb. Nazirlər Kabinetinə iki ay müddətində dövlət və yerli özünüidarə orqanlarının aktlarının elektron informasiya sistemləri vasitəsilə açıqlanması qaydası barədə təkliflərini hazırlayıb, Azərbaycan Respublikası Prezidentinə təqdim etmək və bu Sərəncamdan irəli gələn məsələləri həll etmək tapşırılıb.
