Azərbaycan, Bakı, 3 sentyabr /Trend, müxbir H.Vəliyev/
Rabitə və İnformasiya Texnologiyaları Nazirliyinin Bakı Telefon Rabitəsi İstehsalat Birliyi bəzi paytaxt ATS-lərinin elektronlaşdırılması və NGN texnologiyalarına keçidi üzrə işləri başa çatdırıb. Bu barədə nazirliyin məlumatında deyilir.
Məlumata görə, yaxın günlərdə operator tərəfindən Bakının Yasamal və Nizami rayonlarında, eləcə də Qaradağ rayonunda NGN bazasında yeni stansiyalar istismara veriləcək.
Telefon şəbəkələrinin elektronlaşdırılması və yeni nəsil şəbəkələrin tətbiqi operatora telefon nömrələrinin sayını 7 mindən çox artırmağa imkan verəcək.
NGN şəbəkəsinə keçid prioritet vəzifələrdən biridir ki, operator onun köməyi ilə uzunmüddətli perspektivdə yeni xidmətlər seqmentinin artımını stimullaşdırmaq niyyətindədir. Yeni sistem rabitənin ənənəvi xidmət növlərilə yanaşı, IP-telefoniya, genişzolaqlı internet və IP-TV xidmətləri göstərməyə də imkan verir.
Bu gün operatorun şəbəkəsində fəaliyyət göstərən ATS-lərin 60 faizindən çoxu sonrakı nəsil şəbəkələr bazasında qurulub.
Davamlı rabitə və genişzolaqlı internet xidmətləri göstərilməsi üçün Bakı Telefon Rabitəsi İstehsalat Birliyi şəbəkəsində routerlərdən və Huawei, ZTE и Cisco şirkətlərinin telekommunikasiya avadanlıqlarından istifadə olunur. Həmin avadanlıqlar ATS-lər arasında məlumatların 1 Gbit/san-dən 10 Gbit/san-dək sürətlə ötürülməsinin təşkilinə imkan verir.
Operatora məxsus şəbəkənin müxtəlif seqmentlərində alternativ SDH-Ethernet şəbəkəsi fəaliyyət göstərir ki, bu da IP şəbəkəsinin üstündən mövcud SDH şəbəkəsi üzrə E1 rabitə kanalları təşkil etməyə imkan verir.
Bakı Telefon Rabitəsi İstehsalat Birliyinin planlarına uyğun olaraq, ilin sonunadək 438 və 494 koordinatlı ATS-lər tamamilə istismardan çıxarılacaq. Göstərilən ATS-lərdə bərpa işləri aparmaqla operator bütün şəbəkə infrastrukturunun 100 faiz elektronlaşdırılmasına nail olmağa çalışır. Göstərilən stansiyalarda artıq NGN (Next Generation Network) avadanlıqları quraşdırılıb və genişləndirmə işlərinin aparılmasından sonra koordinat tipli stansiyalar keçmişdə qalacaq.
Operatorun planlarına köhnəlmiş DMS texnologiyaları üzrə fəaliyyət göstərən 493 saylı ATS-in də yenidən qurulması daxildir.
